Некоего еретика яко приятеля своего демони и по смерти борют и сохраняют. Во епископстве Бранцыненьском бысть человек толикаго воздержания, толикия святости житием и чистоты, иже премногим возмнися быти яко другий Иоанн Креститель. И толико прославися имя его, яко вси тамо живущие тоя епархии и от многих градов ко оному, яко к предивному житием и человеку святому великими громадами многонародно схождахуся, но он под покрытым по божественному житию проклятый бе еретик. Но егда прииде конец его, от емших веры учению его зело великочестен яко святый погребен бысть. Помале же описатели веры и благочестия уведавше от верных человек верным свидетельством, яко развратник и еретик бе. Епископ града и оборонители веры, и иннии мнози проразсудиша, иже сожещи тело еретика оного и тако сотвориша. И егда окрест огня по премногу народу ставшу и развратника телу во огнь ввержену, абие демони тело его из огня восхитивше вознесоша на воздух, и тако его над пламенем задержаша, видети же себе к тому како держат не даша. Народи же возбеснеша, на епископа возопиша, еже его и советником его на се самех во огни том сожещи, рекущи, яко завистию подстрекаеми толико правдиваго и святаго человека тело обругаша, его же бог рукою своею невидимо от огня исхити. Слышав же сия, епископ зело ужасеся сего. Сущии же людие о епископе советуют и глаголют: «Не бойся сего, превелебный наш отче епископе, просим: не опечалуйся господа ради, прелесть бо сия есть диаволя, мы же яко опасатели веры и твоего верха. Яко есть утро, иди и подщися приготовитися ко святей службе святыя литургии, и узрим, яко бог с нами есть и чюдом неким явит нам мечтательство сие, да вера вселенская не возъимеет ущербления». Епископ же совета благочестивых послуша и соверши литургию в нарок о пресвятей богородице, и егда прииде к возношению и пресуществлению пречистаго тела спасителя и господа нашего, и егда точию епископ возгласи: «Приидите, ядите, сие есть тело мое», бысть на воздусе шум страшен. Демони же начаша великими гласы вопити: «О, друже наш, до сего яко же могохом боронихом тя и охраняхом умножения ради части нашея, в сей же год протчее о тебе приязни творити силы не имамы, ибо всемощный прибы». И тако стерво оно во огнь опустиша, иже впадши згоре, погибе с телом и душею. Вера же святая и благочестивая и веруемый бог в ней зело от всех возвеличися, противницы же вельми ужасошася и достойную церковную казнь прияша. Отсюду показуется, како диавол лесть во своих крыет, в них же яко лев несыт есть. Видите, како своих по смерти боронит диавол, да тем множае душ прельстити возможет.

Wielkie Zwierciadło Przykładów [ed. Kraków, 1621], Diabeł, XXI.

• hérétiquehereticHäretikerheréticoeretico
• CorpsBodyKörperCuerpoCorpo
• évêquebishopBischofobispovescovo
• HostieHostHostieHostiaOstia
• MesseMassMesseMisamessa
• DémonDemonDämonDemonioDemone
• FeuFireFeuerFuegoFuoco

Tubach Frederic C., 1969. Index exemplorum. A Handbook of medieval religious tales, Helsinki.:

• #2539 : Heretic burned. II. A heretic at the stake is saved by Lucifer until the Host is brought. Lucifer then cries out that a stronger one than he has come. H448 # 40; H470 # 53; H599 # 10; H611 # 73; H644 # 25; H671 # 313; H679 # 40; H719 # 11. (© Frederic C. Tubach)