Некий человек, кленыйся и отдавый себе диаволу и глаголавый «Дай боже во огни згорети», страшно згоре. Лета от рождества господа бога и спаса нашего Иисуса Христа 599 г. Антоний некогда пореклу Круцко во Фландрии с товарищи своими егда творя стязание в сложенном им сребре, в том счете сотворится спор великий между ими, но известных много числа денег, вданных в руце Антонию, клеврети его глаголаху, яко в целости совершенней у них прия, и како много сребро не обретеся. Антоний же пряся, яко се точию прия, о нем же им предложи, и клятву на ся возводя, глаголюще сице: «Дай боже, дабы ми во огни згорети (иже в то время комната тепляcя), аще что от сребра сего взял». Клеврети же его от правды неотступно твердиша, яко Антоний лукавство сотвори, той же в запрении своем утвердися и под клятвою образ креста на челе своем назнаменовав, рече, дабы его диавол взял и дабы во огни згорети, аще кое над клевреты лукавство сотвори. Клеврети же его видевши умысел его в злобе утвержден, показания ради правды, призваша свидетелей, сведущих сложение их и число сребра. Он же и при них никоего же попечения имея о душе своей, на страшное осуждение свое от бога кляся. И егда вечеру пришедшу, вси разыдошася, един той Антоний в храмине оста и приим свяску дров в пещь тоя вложи. И уже сим догарающим, той же нощи и того часа, егда бысть пагуба Антонию, сестра его, иже от града два поприща житие имяше и еще ручное свое дело чинила,— лен ко прядению устрояла, и абие не весть откуда огнь на домовыя пещныя рубища и на лен припаде, и тако оный лен огнь потреби. Сему она зело удивися, едва остатки возможе угасити. Тоя же нощи парохии той, в ней же Антоний живяше, презвитер слыша некоего пса страшное вытие и щекание, зело ужасеся. Сестра же помянутая, яко обья ю превелия печаль, заутро рано зело смущенна и печальна мужа своего здрав ли или ни брат ея Антоний посетити посла. И той егда прииде, обрете двери замчены, седе, ожидая времяни, а яко ничто же слыша, нача скакати и вопити, зовя Антония, да убудится. И егда ничто же слыша, позва ту живущих, и двери отверзоша, внидоша и обретоша Антония и с ризами сожженна, точию чюлки и подвяски его целы. Лавка, на ней же седяше, веема згоре. Сие страшное суда божия збытие по всему граду промчеся, на чюдо же оно многое множество человеков приидоша, обретоша сребро его, его же при себе име невредно. Глава же его, идеже бе, знака не остави. О сем уведаша началнейший князь их Альбрихт и жена его Елисавет. Сий о сем известно сведати послаша и тако обретоша, якоже слышаша. Повествование сие вельми дивно, ибо отсюду показуется, колико бридок есть грех пред господем богом ложныя роты и всякия клятвы и клятвопреступления, и иже сами себе проклинают и зде и тамо вечно погибают. Дай, милостивейший боже, по благодати щедрот твоих, да сердца окаменелыя и затвержалыя чтущих и слышащих сие сокрушение стяжали и дабы лжи кривоприсяжества и проклятия себе самех отвергали.

Wielkie Zwierciadło Przykładów [ed. Kraków, 1621], Krzywoprzysięstwo, IV.

• ParjurePerjuryMeineidPerjurioSpergiuro
• FeuFireFeuerFuegoFuoco
• cadavrecadaverLeichecadávercadavere
• PunitionPunishmentStrafeCastigoPunizione
• ArgentMoneyGeldDineroDenaro