(Fr.) Henri, chanoine de Saint-Cunibert de Cologne menait une vie assez séculière. Un jour, chemin faisant, il vit une nuage lumineux et entendit une voix très douce disant : « Que ta volonté soit faite sur la terre comme au ciel ! » Une autre fois, il se vit dans une vision devant l'autel de la Vierge dans l’église Saint-Cunibert. Il dit l'Ave Maria, mais la Vierge répondit qu'il était un homme perdu et serait damné s'il ne changeait de vie. Le chanoine ne put cependant pas abandonner les plaisirs de la vie séculière. Frappé par une maladie, il se ravisa finalement et se fit moine chez les Cisterciens.

CAPITULUM VIII De Henrico canonico sancti Kuniberti, qui per intercessionem sanctae Mariae conversus est.

Canonicus quidam sancti Kuniberti in Colonia, nomine Henricus, vita satis saecularis, cum die quadam solus equitaret, nubecula lucida viam ipsam eo intuente transvolavit, vocemque clarissimam de ipsa nube audivit: Fiat voluntas tua, sicut in coelo et in terra. Eratque vox eadem tantae dulcedinis, ut quotiens eius postea recordaretur, lacrimis infunderetur. Cumque vocem hanc coelitus demissam minus attenderet, vel potius non intelligeret, nocte quadam per visum se stare vidit in capella domus suae ante altare coram imagine beatae Dei Genitricis. Quam cum verbis angelicis solito salutaret, respondit illa: Ut quid me salutas? Homo perditus es; et nisi vitam tuam emendaveris, citius peribis. Ego enim et Benedictus intercessimus pro te. Qui cum secundam hanc admonitionem, dulcedine vitae saecularis abstractus, negligeret, circa tempus sex hebdomadarum tam gravi infirmitate correptus est, ut inungeretur, nec ulla esset spes vitae eius. Tunc demum ad cor reversus, et quid audierit quidve viderit recordatus, fratribus quibusdam Bergensibus ordinis Cisterciensis ad se vocatis se reddidit, qui in proximo Pascha monachus factus, mentis et precibus beatae Virginis se illuminatum usque hodie gloriatur.
NOVICIUS: Cuius fuit vox illa facta de nube, et quis sensus eius ?
MONACHUS: Quantum ex iam dictis colligitur, beatae Mariae et sancti Benedicti. Orabant enim Christum, ut sicut voluntas eius est in coelo, id est in iusto, ita et eius voluntas, quae semper bona est, fieret in terra, hoc est in illo iuvene tunc peccatore. Nec mirari debes, si peccatores per eam illuminantur, quia secundum nomen eius, ita et laus eius in fines terrae . Maria enim interpretatur stella maris, sive illuminatrix. Quod vero desperati et contra omnem gratiam indurati, per ipsam ad confessionem et veniam reparentur, praesto sunt exempla.