(Fr.) Une femme laïque très pieuse avait l’habitude de communier chaque jour. Elle se sentait tellement comblée par le Corps du Christ qu'elle n'avait pas besoin d'autre nourriture. Une fois, son prêtre rapporta ce miracle à un évêque. Celui-ci, sceptique, proposa au prêtre de tenter une épreuve sur la femme et lui donner une hostie non consacrée. Après l'avoir pris, la femme eut une faim si terrible qu'elle croyait en mourir. En pleurant, elle dit au prêtre qu’elle avait perdu la grâce de Dieu à cause de ses péchés. Il rendit grâce à Dieu, lui donna le vrai Corps du Christ, et la faim disparut.

CAPITULUM XLVII De femina quae de solo corpore Christi vixit.

Femina quaedam, sicut monachus noster Renerus quandoque Scholasticus sancti Andreae in Colonia mihi recitavit, ex multa devotione saepe solita erat communicare. Quae quanto plus cibum coelestem coepit appetere, tanto amplius corporalem coepit fastidire. Quod ubi sensit, ex permissione sui sacerdotis singulis diebus Dominicis communicavit. Cui cibus ille vitalis tantam contulit fortitudinem, ut sine omni esurie corporali proximam exspectaret Dominicam. Hoc multo tempore actitans, gratiam sibi collatam praedicto sacerdoti confessa est. Ille vero cum Episcopo loci rem tam mirabilem recitasset, timens Episcopus aliquid fallaciae esse in causa, sicut vir sapiens respondit: Cum denuo venerit ad te, loco Dominici corporis hostiam ei porrigas non benedictam, per quam citius rei huius experieris veritatem. Quod cum fecisset sacerdos, femina tentatam se ignorans, mox ut domum rediit, tam vehementer esurire coepit, ut morituram se crederet si non ocius manducaret. Currens tamen prius ad sacerdotem, et eandem famem peccatis suis imputans, pedibus illius se prostravit, et gratiam divinitus collatam sibi subtractam lacrimabiliter exposuit. Quod ubi ille audivit, gavisus valde gratias egit Deo, qui facit mirabilia magna solus. Et dedit ei verum Christi corpus. Cuius virtute mox omnis esuries cessit, et gratia subtracta accessit. Episcopus vero haec audiens a sacerdote, et ipse Deum glorificavit.
NOVICIUS: Rem recitas valde miraculosam.
MONACHUS: Si Helias Propheta in fortitudine panis hordeacei ambulavit quadraginta diebus et quadraginta noctibus usque ad montem Dei Oreb, quid miraris si femina haec incolumis potuit vivere pasta pane vitae ? Multiplex ex illo fortitudo est, non solum animae, sed et corporis. Aliud habes supra exemplum de virgine de Quido, quae praeter Christi corpus nihil comedit, excepta uva quam sugebat. In distinctione septima capitulo vicesimo hoc reperies. Audi nunc rem satis gloriosam.