Caesarius Heisterbacensis, Dialogus Miraculorum

DISTINCTIO QUARTA. DE TENTATIONE

CAPITULUM VII De sancto Bernardo Abbate, quem calcios suos inungentem superbiae spiritus subsannavit.

Die quadam humilitatis causa sanctus Abbas Bernardus1365 a ferrario sibi iussit ungentum dari, et in calefactorio ignem fieri. Qui super se ostium claudens, ne ex opere despecto laudem quaerere videretur, calcios suos inungere coepit. Invidens tantae humilitati superbiae spiritus, officinam humilitatis in forma honesti hospitis intravit, et ubi esset Abbas clare voce requisivit. Ad quem cum vir sanctus oculos levasset1366, daemon clamavit: Vach1367 qualis Abbas ! Certe magis deceret illius honestatem hospitibus occurrere, quam ad confusionem fratrum suorum in calciis inungendis occupari. Statim vir sanctus per sanctum Spiritum1368 illum intelligens spiritum esse immundum, rursum ad opus humilitatis oculos reflexit, et spiritus ille ventosus in aerem resolutus, nusquam comparuit.
NOVICIUS: Si viri iusti in operibus despectis timent elationem, vel quod minus est, notari ob illa1369, multum nobis cavendum est de vana gloria, quando opera exercemus sancta et honesta.
MONACHUS: Quid appellas opera sancta et honesta?
NOVICIUS: Orare, cantare, praedicare, hisque similia.
MONACHUS: Nobis, qui iusti nondum1370 sumus, ut dicis, plurimum cavendum est de inani gloria, quia orantes frequenter etiam nolentes extollit ipsa lacrimarum gratia et devotio cordis; cantantes sive psallentes dulcedo vel sonoritas vocis; praedicantes saepe tentat et inflat scientia, eloquentia et sublimitas sermonis. Alii, quod omnino stultitiae deputandum est, cum non habeant gratiam orandi, vel vocem cantandi, sive scientiam facundiamque praedicandi, quasi de habitis gloriantur. Quod etiam maioris dementiae est, quidam ad hoc tantum orant, cantant et praedicant, ut laudem humanam atque temporale emolumentum ex eis consequantur. De talibus Salvator dicit: Amen, dico vobis, receperunt mercedem suam1371, id est, hoc quod quaesierunt, laudem scilicet hominum et lucrum. In iam dictis operibus sanctis quosdam tantum superbia ad meritum1372 tangit; alios per delectationem iam1373 angit; plurimos, ut hypocritas, per consensum et desiderium victos fortiter premit. Vis nunc aliqua de talibus audire exempla?
NOVICIUS: Hoc dudum desideravi.
MONACHUS : De extollentia orationis habes exemplum in secunda distinctione capitulo vicesimo secundo, ubi diabolus ad monachi lacrimas respexit, cum eum gratia eadem1374 extulisset. Quantum sit periculum in vocis extollentia, exempla te instruent1375 subsequentia.

Notes:
  • 1365 B Bernardus Abbas; paulo post CD iussit sibi.
  • 1366 B cum oculos levasset vir sanctus, C cum oculos vir sanctus levasset.
  • 1367 vach dictum pro vah. Eiusdem generis sont ach, och, proch, quae passim occurrunt in hoc Dialogo.
  • 1368 BC Spiritum sanctum.
  • 1369 ADPKR notari ab illa, BC ab illa notari.
  • 1370 BC nondum iusti.
  • 1371 Matth. 6, 5.
  • 1372 C superbia, non meritum.
  • 1373 iam add BC.
  • 1374 C earum.
  • 1375 D instruant. * Homil. I. p. 101.
Indexed exemplum: TE017993
This work directed by J. Berlioz, M. A. Polo de Beaulieu, and Pascal Collomb is licenced for use under ETALAB Open License 2.0 Ce travail réalisé sous la direction de J. Berlioz, M. A. Polo de Beaulieu et Pascal Collomb est mis à disposition sous licence ETALAB Licence Ouverte 2.0 This work directed by J. Berlioz, M. A. Polo de Beaulieu, and Pascal Collomb is licenced for use under ETALAB Open License 2.0 This work directed by J. Berlioz, M. A. Polo de Beaulieu, and Pascal Collomb is licenced for use under ETALAB Open License 2.0 This work directed by J. Berlioz, M. A. Polo de Beaulieu, and Pascal Collomb is licenced for use under ETALAB Open License 2.0
Powered byPropulsé parPowered byPowered byPropulsado para