Thesaurus Exemplorum
Medii Aevi

'Qui infirmus est, olera manducet' ¹. Fragmentis pulmentum adiciendum est, quo Christi reficiantur pauperes. Confessus sum in prefatione Dyalogi², qui per meum ministerium ad abbatis mei³ imperium conscriptus est, ex fragmentis, que superauerunt his qui sublimia sacre scripture uolumina ediderunt, XII sportellas, XII scilicet distinctionum, inpleuisse ad pauperum, id est humilium spiritu, refectionem. Nunc uero eadem auctoritate⁴ compellor infirmis ingenio uel scientia, qui dentibus intelligentie fortes sensuum allegoricarum cibos non sufficiunt mandere neque per stomachum memorie digerere, coquere pulmentum ex diuersis uirtutum exemplis quasi uariis oleribus collectum. Ad coquum pertinet diuersas species herbarum cognoscere, cognita colligere, collecta purgare et in ollam concidere sicque mensurate decoquere, salire atque condire. Cum nullius habeam horum scientiam, si herbas agrestes siue colloquintidas, exempla friuola recipiendo, inmiscuero illaque per insipidam Latinitatem decoxero, uereor aliquos esse dicturos: 'Qualis erat mulier, tale coquebat olus'⁵. Quibus ego pretendam infirmantium necessitatem: que fortibus bene sapiunt, infirmis non conueniunt. Non enim in hoc opusculo dialogi morem⁶ seruare uolui neque eiusdem generis exempla ubique continuare potui, sed que michi sunt comperta uel a personis relata ueridicis, prout occurrunt, scripto commendaui, loco quarti libri et quinti passionem et miracula domini Engelberti Coloniensis archiepiscopi, qui me ista scribente occisus est⁷, inserens. Nomen auctoris⁸ initiales littere librorum coniuncte declarant.