Thesaurus Exemplorum
Medii Aevi

Uacellis⁸⁷, quae est domus ordinis Cysterciensis, sacerdos quidam fuit et forte adhuc est, Gerardus nomine, officio infirmarius. Iste dum die quadam missam celebraret in conuentu sollempniter, assistente sibi dyacono atque subdyacono, ex quibus alter filius eius erat carnalis, post consecrationem sacramentorum magnam circa se contemplatus est claritatem. Qua ex omni parte perfusus uidit mire pulcritudinis coronam capiti suo inponi, alteram filio et, sicut ipse confessus est, eque retro ut ante uidere potuit; tanta fuit uirtus eiusdem uisionis. — Hac michi relata sunt a domino Wigero Uilariense⁸⁸, mature etatis sacerdote.

Quanta pena digni sunt in futuro apud Deum, qui Christi sacerdotes, qui sunt medici animarum, dolo circumueniunt uel aliis quibuslibet iniuriis molestant, unius dolosi pena temporalis ostendit.