Thesaurus Exemplorum
Medii Aevi
Caesarius Heisterbacensis, Libri VIII miraculorum
INCIPIT LIBER PRIMUS MIRACULORUM
De sacrista, quem propter furtum gemmate crucis ferrum uomeris frigidum exussit.
Temporibus nostris in Flandria ciuitate quadam, cuius nomen excidit, in conuentuali ecclesia clericorum lignum Dominicum auro gemmisque inclusum a custode ecclesie furto subtractum est et in terra sepultum. Cumque illam concupiscens rapuisset nec tamen consumere posset, abscondit illud. Decanus uero et fratres, cum de cruce subtracta plurimum dolerent nec tamen reum scirent, iuueni cuidam modicum habenti et honeste uiuenti, sola ducti suspicione, crimen furti eiusdem inpingebant. Cumque ille negaret nec crederent, adiudicatus est sententie ferri candentis. Et cum non haberetur ferrum conueniens, uomer de aratro decani sublatus est, ignitus et benedictus iuuenique ad portandum porrectus. Ille de bona conscientia presumens, ferrum intrepidus leuauit et supra spatium definitum illud portans iuxta sepem in ortum204 decani iactauit. Tempore uno cum ferrum a decano requireretur, supradictus custos, decani commensalis, respondit: "Bene recordor iuuenem uomerem in talem locum proiecisse; uadam et queram". Cumque inuenisset et leuasset, decano presente, mirabili Dei uirtute sic exustus est, ut cum clamore ualido uomerem iaсtaret. Et notum factum est omnibus, quod ipse crucem rapuisset. Qui cum negare non posset, omni honore simul et stipendio priuatus, de ecclesia illa eliminatus est. Hec dicta sufficiant de peste auaritie.
Porro accidie morbus205 satis periculosus est, animam plurimum corrumpens et penis eternis, si per penitentiam non fuerit sanatus, cruciandam adducens. De hoc ueracissimum proferemus exemplum, a domino Conrado Portuensi episcopo206 abbati nostro relatum.
- 204 D.i. 'hortum'.
- 205 Über die bei Mönchen oft getadelte Untugend der ἀκήδεια vgl. z. B. Band I, 160 (Nr. 235), 176 (Nr. 280).
- 206 Über Kardinalbischof Konrad von Porto vgl. oben S. 21 Anm. 1
