Thesaurus Exemplorum
Medii Aevi
Caesarius Heisterbacensis, Libri VIII miraculorum
INCIPIT SECUNDUS LIBER.
De usurario, cui sanctus Iacobus pecuniam restituit, cum moreretur323.
Usurarius quidam in ciuitate Treuerensi manebat. Qui tempore quodam compunctus limina Sancti Iacobi apostoli in Compostella324 uisitauit, quinque libras expendens in itinere. Reuersus in domum suam usuris intendebat ut prius. Post aliquot annos grauiter infirmatus, cum mori timeret, beatum apostolum frequenter inuocauit, peregrinationis labores simul et expensas illi quasi ad memoriam reducens. "Sancte", inquit, "Iacobe, recordare quod quinque libras expenderim in seruitio tuo". Cumque huiusmodi uerbis apostolum inquietaret, beatus apostolos illi apparens et coram ipso stans ait: "Ego sum apostolus Iacobus, cuius limina uisitasti". Quo audito ille gauisus clamare cepit: "Sante Iacobe, adiuua me", crebrius illud repetens. Cui apostolus respondit: "Peccata tua te inpediunt; laboraui pro te, quantum potui, sed non profeci. Ecce! quinque libras, quas in meo seruitio expendisti, in manu teneo, quas tibi restituo". Usurario clamante: "Domine, domine, non illas recipere uolo", apostolus pecuniam panniculo inuolutam ad caput usurarii posuit et disparuit. — Ex quo probatur elemosinam de malo conquisitam Deo placere non posse. Hac michi a quodam presbytero religioso recitata sunt, qui se ueraciter intellexisse dicebat.
- 323 Daraus bei Herbert, Cat. of romances III, 615, 133.
- 324 Der bekannte Wallfahrtsort Santiago de Compostela in Spanien.