Thesaurus Exemplorum
Medii Aevi
Caesarius Heisterbacensis, Libri VIII miraculorum
INCIPIT SECUNDUS LIBER.
De milite in Sueuia , qui uirginem , eo quod uocaretur Maria, corrumpere noluit245.
Aliud audiui nuper a quodam abbate ordinis nostri de nomine gloriose Uirginis, huic miraculo non dissimile, immo indicium maioris gratie. Miles quidam de Sueuia potens et diues per uillam quandam transibat, in qua puelle choream ducebant. Uidens ibi uirginem speciosam ualde, concupiuit illam mittensque aliquem de suis ad parentes eius ait: "Placeat uobis, ut filia uestra consentiat uoluntati mee, et quidquid postulaueritis pecunie, libens tradam uobis". Illi, eo quod essent de humili progenie nec multum diuites, tum propter militis honestatem tum propter pecuniam uirginem ad illius domum transmiserunt. Quam cum uidisset ac salutasset, subiunxit : "Quod est tibi nomen?" Respondente illa: "Maria uocor", miles ad gloriam tanti nominis pauens subiunxit: "Propter honorem domine mee sancte Marie, cuius equiuoca es, parcam tibi neque per me uirginitate tua priuaberis. Uerumtamen, quidquid parentibus tuis promisi, mittam et tibi dabo".Quod et fecit . Non multo post in bello occisus, in campo sepultus est. Beata Dei Genitrix, mater misericordie, sacerdoti, cuius parrochianus idem miles exstiterat, apparens ait: "Militem talem", nomen eius exprimens, "uide, ut cum honore in cimiterio sepelias, quia, qui nomen meum honorauit in hoc mundo, per me receptus est in celo" et reuelauit ei rem gestam per ordinem. Sacerdos uero rem inuestigans et ita, sicut diuinitus acceperat, esse intelligens, cum multo gaudio cordis sui corpus militis bestialiter sepultum extraxit et in atrio ecclesie cum honore debito sepeliuit. Et magnificauit nomen Uirginis beatissime, gloriam eius ubique diuulgans et, quam magnifice se honorantes sibique seruientes remuneret, omnibus predicans.
Hoc uerum esse plenius ex sequenti cognosci poterit relatione. Quod autem dicturus sum, eodem tempore, quo res gesta est, didici, referente michi persona admodum religiosa.
- 245 Eine andere Fassung unten im Anhang Nr. 61 (III, 41 bei Meister). Vgl. Mirac. b. u. Mariae index, Anal. Boll. XXI, Nr. 1067. Der Stoff ist weit verbreitet: Ward, Cat. of romances II 628,16. 697,9; Herbert, eb. III 543,12. 614, 112; Uiaticum narrationum Nr. 43; Mussafia, Marienlegenden III 10, Nr. 9; Vincentius Bellovac, Spec. hist. VII (VIII),102/3; Scala celi des Gobii iunior f. 115r (Quelle: Mariale magnum); Herolt, Prompt, mirac. b. Virg. Nr 63; Magnum speculum exemplorum S. 462; Alfonso el Sabio, cantiga 195; Klapper, Erzählungen des Mittelalters Nr. 51; A. Weber, Handschriftl. Studien S. 16; Jubinal, Nouveau recueil I 173; Mielot Nr. 46: A. Keller, Erzählungen aus altdeutschen Hss. (Bibl. des litterar. Vereins in Stuttgart 35) 41; Franz Baer, a.a.O., S. 65; Hagen, Gesamtabenteuer III 73; Miracoli della Madonna ed. G. Paganmo, Parma 1841, Nr. 23; De Vooys, Middelnederlandse Legenden en exempelen, Groningen 1926, S. 109; Anal. Boll. XLII, 43.
