De sancto Petro, mart.

[6] Sic beatus Petrus ubique hereticos esse sciebat, illuc protinus pergebat maior audacia quando ipsi hostes fuerunt armati. [7] Erant autem heretici armati et propter apparenciam uite et propter auctoritates sacre scripture, sed eorum uitam detegebat et auctoritates confringebat; maxima audacia quando fuerunt multi, ideo dicit in plurali ’armatis’; permaxima gaudenter occidere, ideo dicit ’exultet audacter’. [8] Istos autem hereticos quatuor modis conuincebat. [9] Primo scripturarum testimoniis, I Pet. [10] III: Parati semper ad satisfaciendum etc.; unde sepe hereticis dicebat quod de tota sacra scriptura testimonia sua proferrent et ipse tantum pro se unum, scilicet Paulum, assumeret. [11] Secundo ostensis miraculis; unde cum quendam heresiarcham coram populo excommunicaret et maximus estus cunctos afficeret premisso signo crucis mox nubes descendit que refrigerium fecit. [12] Tertio orationibus deuotis; unde cum quidam hereticus garrulus contra eum minis instaret, ille deum orauit ut aut eum conuerteret aut lingua priuaret; statimque mutus factus est. [13] Quarto ex multa constantia mentis; quam quidem constantiam mentis ex tribus conceperat. [14] Primo ex magno fidei feruore; unde dicitur in epistola sue canonizationis: ’feruens quoque fidei amator, fidem sic animo suo illam impresserat quod queque uerba et opera ipsius uirtute fidei redolebant’. [15] Secundo ex multa fiducia de dei bonitate, qui sepe in ignem pro ueritate fidei astruenda intrare uoluit, si ipsam heretici sequerentur. [16] Tertio ex diuina reuelatione; nam cum agones suos uirgini recommendaret, sibi dormienti responsum est ’Ego rogaui pro te Petre, ut non deficiat fides tua’. [17] Quamuis uero beatus Petrus de hereticis fuerat natus, ab ipsorum tamen erroribus fuit penitus alienatus; processit enim ab eis sicut lux a tenebris, II Cor. IIII: Deus qui dixit de tenebris lucem splendescere etc.; sicut lilium de spinis, Cant. II : Sicut lilium inter spinas etc.; sicut es sonorum de lapidibus duris, Iob XXVIII : Lapis solutus calore solis in es uertitur; sicut stella micans de nebulis, Eccli. L : Quasi stella matutina in medio nebule etc.

Jacobus de Voragine, Legenda aurea [ed. G.P. Maggioni, 1998], chap. 61, p. 421-427, n° 7-78; Jacobus a Voragine, Legenda aurea [trad. A. Boureau et alii, 2004], p. 336-341.

Sermon additionnel (numéroté 430a) non répertorié dans Schneyer, provenant de l’édition en cours G.-P. Maggioni (http://www.sermones.net/).

• Saint PierreSaint Peterder heilige PeterSan PedroSan Pietro
• HérésieHeresyHäresieHerejíaEresia
• évangileGospelEvangeliumEvangeliovangelo
• PrièrePrayerGebetOraciónPreghiera
• MiracleMiracleWunderMilagroMiracolo
• foifaithGlaubefefede