О некоем отрочати иже великия муки претерпе и от тех материю своею избавися. Некое дитя десяти лет сущее, во словесех утешное и матери любезное, умре. И в мале времени по смерти показася матери своей зело умучен и истомлен. И егда мати жалостне нача испытовати, что ему тако бысть, он же едва отвеща: «В великих и тяжких муках, мати моя». И та плачющи рече: «То чесо ради, чадо мое, толикое мучение тебе и каковое?» И дитя страшное слово изрече, глаголя: «Егда бы углие, его же жгут, от всея вселенныя собрано воедино и возгоревшися посреде бы кто ввержен был, не толики бы болезни чюл, яко же аз в муках». И паки мати вопроси: «Како такову муку исходатайствова себе, чадо, яко во всем нам послушлив был еси, родителем, и любочестен, молился же усердно и ниже кого злоречил еси, ниже к нам на сирот клеветал еси, ниже кого клял еси». И отвеща дитя: «Аще и ничто же тех согрешил, но за се стражду, яко обыкох у сирот и челяди взимати сребренницы и на се куповах игрушки и овощие. Егда же прилучахуся у нас гости, дароваху мне сребро, и аз им платах. И не успех же всего заплатити и умрох, и за се терплю таковую муку». И мати вопроси: «Мощно ли чим тебе помощи?» Отвеща отроча: «Аще заплатиши за мя той долг, то избавлюся», и тако невидим бысть. Тогда созва мати его раб и рабынь и рече, плачущи: «Скажите, что у кого взя отроча мое сребрениц?» И егда вси сказаша и исчислиша, обретоша десять гривен сербра. И немедленно своима рукама заплати онем и прощения о обиде прося у них. И тоя нощи паки явися ей оно отроча и рече: «Благодарю тя, мати моя, яко тобою избавихся от мук онех и ныне гряду в вечное упокоение и за вас обещаваюся богу молитися».

Wielkie Zwierciadło Przykładów [ed. Kraków, 1621], Restytucja, II.

• FilsSonSohnHijoFiglio
• EnfantChildKindNiñobambino
• MèreMotherMutterMadreMadre
• PunitionPunishmentStrafeCastigoPunizione
• voltheftDiebstahlrobofurto
• ArgentMoneyGeldDineroDenaro
• restitutionrestitutionRückgaberestituciónrestituzione
• ApparitionApparitionErscheinungApariciónApparizione