Како новоначалный мних покаянием и исповеданием святым грехи свои у диавола написанныя отъя. Юноша добродетельный и зело благочестивый, оставя родители своя, и дом, и братию, и наследие свое отдаде дому божию, прииде же в монастырь и пострижеся. Обаче же тамо таковый обычай бысть, аще кто хощет во иноческий чин виити, то всех прежде грехов своих, их же сотворил в мире, исповедают пред всею братиею отцу игумену. И той юноша такожде зело благоумилене всех грехов исповедался и пострижеся и, вельми тому радуяся, с тем веселием и упованием в келлию отиде. Седе же по молитвенача помышляти глаголя: «Благо бы ми было, еще бы ми дух мой в час сий из мене изяти господь бог мой изволил. Уповаю, яко переселился бых в места крова дивна дому божия, ибо яко яже имех грехи моя предложих и явих ему и восприях спасителный ярем его». И тако ему бодрствующу и помышляющу, и незапу ста пред ним скверный демон, показуя в руках своих хартию, и рече к нему: «Что ты тако хвалишися, величаяся, яко добре исповедаяся. Соблажняешися: неси убо таков чист, яко же мниши себе, но льстишися»,— и показуя хартию: «се на сей хартии еще премного грехов твоих, и о сих ты николи же печаловал еси, ниже исповедался сих, и сими на суде божий имам тя обличати». Сия видя, юный мних зело преужасеся, по сем упованием укрепися, нача в совести своей грехи изчисляти и обрете ничто же не исповедано. Рече демону: «Прошу убо тя, аще хартии в руки не даси ми, то покажи ю во своих руках на аере, да познаю, аще мои суть. Аще ли же не покажеши, то веры не имам ти, понеже ложь еси и отец лжи, и мню, яко гочию пришел еси пристрашити мя и вложити во отчаяние». И рече демон: «Ни, калугере, ныне тебе сей хартии не покажу, но на суде познати правду имаши. И аще аз ныне лож, то тогда тя имам обличити и пойму тя яко пленника моего и на муки поведу. Знаю же и аз хитрость твою аще бы сведал тыя грехи своя, такожде бы покаянием загладил и мне бы посмеялся. И в том часе юноша той поручи и преда всего себе богови и в горячести духа избавления своего взимаяся. И еже прошением не стяжа, восхоте сие силою отъяти. И демон, сие познав, сверну писание крепко держати нача, и егда юноша воста, демон хотя чрез обитель утещи, побеже из келлии и юноша по нем. Диявол же окрест келлии, юноша за ним же, диявол на восход церковный, хотя сквозе церковь утещи,— юноша за ним же. Диявол на звонарный всход — юноша за ним , и за изволением божиим демон ударися о било церковное и паде и хартию опусти. Юноша же, восхитив ю, рад бысть зело, тече в келлию и, назнаменав крестным знамением, и написанное прочте и найде грехи своя их же не исповеда и исповедати не воспомяну, мня, яко ничто же суть, весь слезами обливаяся и священника возбуди и оны грехи своя исповеда. Демон же стоя у келлии прискорбен, и юноша возврати ему хартию тщу. И виде демон, яко греси его заглажени суть и не обретошася на хартии, устыдевшися изчезе. Инок же той в великих исправлениях и добродетели поживе и бысть чюдотворец.

Wielkie Zwierciadło Przykładów [ed. Kraków, 1621], Spowiedź, XXII.

• MoineMonkMönchMonjeMonaco
• ConfessionConfessionBeichteConfesiónConfessione
• écritwritingSchriftstückescritoscritto
• DiableDevilTeufelDiabloDiavolo
• PéchéSinSündePecadoPeccato
• clochebellGlockecampanacampana