Како человецы истинным покаянием светлость приемлют, и како диявол хотя покаятися. Священник добродетелный и учитель изрядный егда в великий пост овец паствы своея приемля и разрешая сомнение, и тако они отпущение приемши исхождаху, инии же вшедших прежидаху. И между ожидающими некий младый и силный видом прииде. Егда же вси отправлены быша, приступи последи всех ко иерею и ко исповеданию припаде и по обычному чину отверзе уста своя и нача таковыя грехи поведати, яковым невозможно человеку творити и плодити. Колико неизреченно убийств, колико кривоприсяжеств, колико лихоимства, колико клевет, крадежъства, лжи, ненависти, зависти, свад и инех злых грехов смертных премного и неизчетно поведа и над всеми сими и сим всем исповеда себе начало всему злу: «Аз, рече, всем злым делом вина, и повод, и предводитель, и наглагольник». Священник же бриткостью и гнусостию скверных и неисчетных дел изрицания оскорбися и от их же исповедати хотя стужи си и рече ему: «Или тысяшу лет уже жил еси, яко толикое содея неизчислимая злая?» И той рече: «Имам, отче, вящщи нежели тысящу лет». Сия слышав, иерей рече: «Кто же еси ты?» Он же отвеща: «Аз есмь един от тех, иже со отцем нашим сатаною с небеси низпадох. Грехов же моих малую часть пред тобою поведах. Аще ли же бы хотел еще послушати, имею бо их без числа и готов исповедати». Иерей же, ведая, яко грех демоньский неизцелен, рече: «О, начнете и прескверне душе, тма убо еси несветимая во веки! Кое ти причастие ко свету, и что во твоем лестном исповедании и покаянии?» И отвеща демон: «Не злослови мя, отче,— сея ради вины приидох к тебе покаятися, яко видех кающихся пред тобою и исходящих от церкви оправданных и отпущению грехов сподобившихся, душею и телом просвещенных. Слышав же аз, что к тебе они вещали и кия грехи извещали, сему и аз возревновах, яко от тебе прияша от тяжких грехов отпущение и живота вечнаго обещание. Такоже и аз возжелах отпущения грехов и царствия небеснаго, приидох грехи моя тебе исповедати». Иерей же рече ему: «Аще толиких благих хощеши, то совету моего послушай, демоне; сотвори совершенное и особное за грехи твоя покаяние, и яковых же видел еси отсюду исходящих, таковое и ты одержати имаши». И отвеще демон: «Но точию аще удобну ми к ношению предаси епитимию». Иерей же рече: «Зело малейшую пред онеми! Сие точию сотвори: иди и трикратно припади на землю, падши же рцы: «Боже милостивый, сотворителю мой, помилуй мя, согреших к тебе, отпусти ми!» Сицевое точию покаяние твое буди». И рече демон: «Ни, не могу сего сотворити, зело бо ми есть тяжко сие». И рече священник: «Чесого ради таковая малая епитимия и слово оно тяжко тебе?» И отвеща диавол: «Понеже не могу тако смиритися и уничижитися, но аще что повелиши кроме сего, усердно сотворю». Тогда иерей рече: «О злый демоне! Аще толикая сердце твоего гордость, иже ниже хощеши, ниже можеши покоритися и унизитися пред создателем своим, то несть ти помощи никое же, сыне погибели, отиди убо, и иди в преисподний свой тартар, ибо ни зде, ни онамо милосердия несть ти во веки».

Wielkie Zwierciadło Przykładów [ed. Kraków, 1621], Spowiedź, XVIII.

• DiableDevilTeufelDiabloDiavolo
• ConfessionConfessionBeichteConfesiónConfessione
• PénitencePenanceBussePenitenciaPenitenza
• OrgueilPrideHochmutOrgulloSuperbia

Tubach Frederic C., 1969. Index exemplorum. A Handbook of medieval religious tales, Helsinki.:

• #1637 : Devil (demon) too proud for penance. A demon goes to confession but remains damned because he is too proud to do the simple penance of humbling himself before God. CHeist-III #26; H66 # 73, H284 # 57, H311 # 67, H354 # 41, H476 # 62, H506 # 34, H542 # 35, H679 # 36; Pelbart # 43.– Arnould, Péchés, p. 180 # 57; de Vooys, p. 242 (notes). (© Frederic C. Tubach)