О еже присещают в делех благоугодных святии, и о чести иерейской. Во Англии во граде Лондониуме краль Герберт, ново из нечестия поганьскаго во христианьскую веру пришедый и во граде оном храм святаго апостола Павла созда, пред градом же обитель чюдную и храм красный святому апостолу Петру возгради, его же премногими богатьствы дарова и доходы. Егда же того града епископ уготовися оный святаго апостола Петра храм святити, нощи же оноя пред освящением яви себе святый апостол Петр некоему рыбарю, повелевая превести себе ко оному храму чрез реку, глаголемую Тамену, за превоз же обещася егда возвратится вспять заплатити. И егда его рыбарь превезе, изыде из лодиицы и вниде во храм оный. На сия зря прилежно рыбарь, видит и се храм оный небесною светлостию объяснися, и множество святых во храм внидоша, и пение небесное возгреме, и благоухание чюдное наступи. И по многом времени кончася, и тако во оном храме великий Петр все, якоже довлеет и належит по священию, соверши, и прииде паки к рыбарю и, вступая в лодиицу, испытует рыбаря, аще имать рыбы. Он же отвеща: «Тебе и светлости необыкшей пристрашихся, трепетен бых, и ничто же улових, но обещанный от тебе заплаты ожидах». И рече ему великий Петр: «Запусти твоя сети!» И егда рыбарь повеленное сотвори, множество многое улови рыб, между же сими и великаго осетра. И рече ему святый апостол Петр: «Сего осетра преподаждь Мелетию епископу, прочия же рыбы себе употреби. За превоз же даю тебе и роду твоему по тебе благословение на счасливое и премногое рыб ловление. Единою же заповедаю ти, да в неделю никако же ловити дерзнеши. Извествую же ти: яко есмь аз апостол Петр, глаголяй с тобою. Храм же во имя мое с прочими клевреты моими посвятих. Повеждь же еже видел еси и слышал епископу Мелетию, твоему же глаголу воспоследует свидетельство: помазание стен и прочая приличествующая священию, и да не дерзнет паки посвящати, да навершит точию святою литургией. Возвести же и людем, яко место сие часто начну присещати и при молитвах и прошениях верных буду, и иже кто благоверно, праведно же и трезвено на сем месте жити начнет, небесная врата сим отворю». И сия изрекши, невидим бысть. Заутра же, егда епископ на освящение храма уготовися, рыбарь же оный прииде, несый с собою осетра, поднесе его епископу, от апостола же Петра повеленная и слышанная и виденная извести ему. Удивися епископ удивлением велиим чюдеси сему, со тщанием и удивлением вниде во храм, обрете время и лето посвящению подписано и в двунадесятих местех на стенах помазание, и двадесят недогоревших свечь, при них же и кресты, и стен кропление свеже и неизреченно благоухание. Сие видев и слышав, епископ со всеми людьми в радости и умилении воздаша славу великому богу и святому апостолу и верховному Петру праздньственную сотвориша память и блажение. Посем еха в Рим чюдо сие папе возвести и вящее попечение о нововверенных людех прият.

Ce récit est sans doute un ajout de la traduction russe à partir de sources occidentales.

• Saint PierreSaint Peterder heilige PeterSan PedroSan Pietro
• LondresLondonLondonLondresLondra
• cathédralecathedralDomcatedralcattedrale
• ConsécrationConsecrationWeiheConsagraciónConsacrazione
• évêquebishopBischofobispovescovo
• PêcheurFishermanFischerPescadorPescatore
• ApparitionApparitionErscheinungApariciónApparizione