О епископе Рустике и о святем Гоаре зде являет сия повесть еже яро не судити. Клирицы нецыи святаго Гоара ложно оклеветаша, к Рустику епископу Триверийскому, яко невоздержное житие имать и во удовлетворении плотских похотей подавает, покой любяй и всякое сладострастие. Епископ же повеле святаго Гоара привести пред ся оным оклеветавшим его. И егда ведоша его чрез безводную пустыню, возжадавшеся ведущий от безводия и умираху. Святый же Гоар, милосердуя о них, видев три лани, и о имени божий повеле им стати и удоиша их, и не точию во оно время от млека сего удовлишася, но и на много время сие преизобильствова. Случижеся или от налога плоти, или от навета диаволя, прежде оклеветания святаго Гоара, епископ оный Рустик впаде в блуд с некоею женою. От сего же она жена зачат плод. И егда святаго Гоара приведоша пред епископа, приспе время родити жене, и роди, потаене же принесе и приверже сие ко двору епископа. И егда детище поверженное узреша, подъемше нецыи и принесоша его ко епископу. Епископ же аще и паде, но не ведаше, яко от него есть. В то же время Рустик повеле представити пред ся святаго Гоара, судя же его и наказуя зело, и паче ложное свидетельство вменяя в правду быти, словесем же святаго никако же внимая и много оскорбляя его словесы. Последи же рече: «Ныне принесоша пред мя новорожденное приверженое ко двору моему детище, и хощу ведати, кто сему детищу отец. Ты же, аще хощеши от возвещаннаго на тя чист быти,— повели, яко слышах тя пред богом прежде во благоугодных ему делех велика, да провещает сие детище и да возвестит, кто есть отец его». Святый же Гоар не отречеся сего, но приступи к детищу рече: «Во имя святыя и единосущныя и неразделимыя троицы рцы, детище, кто есть отец твой!» Сего завещания детище малейшее послуша, и от пелен руку протяже на епископа показа, рече явственно: «Се отец мой!» Сие видев, епископ позна грех свой, ужасеся велиим ужасом, и убояся суда божия, и судимому от него Гоару — человеку божию — к ногам припаде, покаяние к богу принося, обливая нозе его слезами, винам своим отпущение прося и возложения на ся казни во очищение своего великого падения и на главе своей от человеков осуждения.

• EnfantChildKindNiñobambino
• SaintSaintHeiligerSantoSanto
• évêquebishopBischofobispovescovo
• accusationaccusationAnklageacusaciónaccusa
• ParoleWordWortPalabraParola
• PéchéSinSündePecadoPeccato