Во гресех пребывающим и притворно кающимся добрии пастырие не спребывают, да не сообщни будут грехом их. В Барцыноне граде Арагонския земли Раймунд некий святый и великий муж великая и дивная еще жив сый солевая чюдеса, ибо трех от мертвых молитвою воскреси, а по смерти многая чюдеса сотвори. Сей святый Раймунд бяше отец духовный и пастырь арагонскому кралю Иякову и во обхождении с кралем сотвори угодное богу и дивное человеком удивление. Ияков, оный краль арагонский, впаде во грехи многи и каяся, но паки на тыяжде возвращаяся, ибо име у себе надзаконную жену наложницу. Сие уведав, пастырь его и отец добрый Раймунд судом божиим и муками от сего краля возражая и проклятием претя. И краль, боязнию от него содрогался оную отврещи обещаваяся, но паки злым обычаем соодолеваем, в первых пребывая. И некогда восхоте краль Ияков от Барцынона превестися морем во остров некий, глаголемый Маорика, и святаго Раймунда желая имети с собою, но святый никако же с ним пребывати хотя, точию аще грешити престанет и любодеицу отставит. И краль о сем обещася, потаенне же споя с собою и сию. И егда превезъшимся им во остров некий уведа святый Раймунд зело о сем огорчися, всеконечно отречеся быти с кралем, даже грехов его участник и сообщник не будет. Краль же, сие уведав, под главною казнию запрети, да никто же дерзнет Раймунда превести чрез море до Барцынона. Сие, видев, чюдный Раймунд, духом божиим восперився, мантию свою распростре на море, знамением крестным и словом божиим назнаменав море, клобук на костор завяза, седе на мантию, клобуком же, яко веслом, грести нача, и тако плавая по морю дивным устроением от бога управляем, 70 миль, еже есть триста пятьдесят поприщь шестию часы от Маорики до Барцынона преиде. Егда же пустившуся ему на море, возвестиша о сем дивном зрении кралю Иякову, его же велением сотворися во острове и граде мятеж велий, ибо всем повелевая со всякою скоростию во всех припасех плавания морскаго за Раймундом гнати и молити его, да возвратится. Но всуе трудившеся гонившии, ибо уже святый Раймунд ко брегу Барцынона приста, ризы же его и камилав ни следа возиме морския воды. Сие уведавша гражданьство безчисленное множество на чюдо стекошася, к ногам же великаго мужа и чюднаго припадаху и целоваху и прикоснутием риз его, ими же море преплы, мнози недужнии исцелеша. По преставлении же его от гроба его червленую некую шерьсть приемляху и недугующим подаваху, и от сего многоразличныя недуги исцелешася. Краль же Ияков, слыша и видя сие, отречеся нечестия своего и пришед с покорением великим, умоли отца своего и прия правильное на ся покаяние и исправление.

Magnum speculum exemplorum [ed. Cologne, 1610], Perceverantia in peccatis, 1.

• merseaMeermarmare
• SaintSaintHeiligerSantoSanto
• MiracleMiracleWunderMilagroMiracolo
• VoyageTravelReiseviajeViaggio
• ConcubineConcubineKonkubineConcubinaConcubina
• RoiKingKönigReyRe