Евагрий видением ангельским от падения спасеся и еже во сне обеща на яве исполни. Блаженный Евагрий от святаго и великаго Василия в четцы посвящен, от Григория же Богослова во дияконы поставлен бысть, сей Евагрий зело премудр бе в словесном наказании и писании святем и на еретики великий ратник. Того ради в державном и великом Константине граде предивнаго ради его учения от всех почитаем зело и любим и вельми прославлен от бога и человек. Ненавидяй же благодеяния и не хотяй же никому добра враг диавол чюднаго исправления и дара, иже от бога стяжа. не терпя вложи в сердце его злыя и скверныя помыслы и распадением плоти принуждаше его к падению. Каковым же обычаем сие на него враг наведе, сам последи поведа. Жена некая от благородных воззре на него, егда учащу ему, безстыдным оком похотения, посем приваби его в дом свой прилогом, яко бы не может насытитися сладкаго его учения. И едва не прииде со оною в совершенное падение, аше бы не бог по милости своей дал ему страх свой напомянути; к тому страж природный, еже есть совестное убодание, от сего оного отведе и воспоминая будущая благая и злая, еще же в таковым сану и учении бояся хулы и поноса, а паче размышляя, яко еретицы приимут прилог хуления на бога и учения и все сие в склонении и в сложении на грех себе разполагая, избавителя и господа от всего сердца нача просити, дабы жену возбесившуюся нань благоволил усмирите, но изрешитися, от налогу ея удержан и стражею обложен в дому ея, едва возможе сицевым образом: молящуся ему убо непрестанно, дабы его господь бог от греха сего великаго, иже едва уже делом не збыся, избавил, и готовый в помощь бог услыша болезненый глас его. И егда убо ему по многом размышлении и молении уснувшу, во сне тонце прииде к нему ангел божий и показася яко градский судия: прииде со множеством воинства и повеле его взяти и связати и отвести в судилищную полату, и тамо по рукам и ногам оковати, но за кую вину тако его смириша, сего ему не возвестиша. Евагрий же аще и во сне сие ему действовася, но от неусыпаемыя совести побуждаем помышляет, яко муж жены оныя господин нарочитый судии на него согласие со женою оповеда или паче и не совершившееся в дело сложи, к тому слышит гласы некия от человек неких мучимых бедне износимыя, вопрошаемых в винах их того ради великим страхом объят быв и в великой печали седя. Тогда ангел божий прият на ся образ некоего друга его верна, пришед же глаголет ему: «Что зде твориши, друже мой диаконе Евагрие?» Он же отвеща: «Истинно реку ти, яко не вем, чесо ради зде восхищен и за кое дело тако смириша мя, точию поразумеваю, яко оный благородный господин от позрения неподобнаго и ревности к жене своей оклевета мя к судии и боюся да не на мзде судия от оного учнет мя мучити». И мняся приятель его рече ему: «Аще мя послушаеши, вернаго тебе приятеля и друга, извествую же яко не добре зде поживется тебе. Изыди отсюду из Царяграда». И Евагрий рече: «Аще мя господь бог из сего моего зла избавит, ей не узриши мя, друже мой, в сем царствующем граде». И рече ему ангел, мневыйся воистинну друг искренний: «Еже имаши в руку твоею евангелие кленися им еже из града сего изыти и о спасении души твоея пещися, и аз тя яко приятеля моего от беды сея и тесноты избавлю». Тогда Евагрий изем из недр своих евангелие, кляся им ко ангелу, еже немедленно избыти из Царя града, точию сие время премедлити, донде же вещи своя, паче же книги в корабль отнесет. И сие сна действо егда совершися, Евагрий же убудися и пришед в чювство помышляше глаголя: «Аще и во сне сие о мне приключися быти, но верую, яко истинною бога моего благодать, хранящая мя ангелом своим, показа ми сие, и вем, яко никако зде избыти ми от оныя жены, а паче яко кляхся о евангелии моем подобает ми совершити». И абие воста, вся своя книги и вещи потаенно в корабль принесе и сам в него седе, прииде во Иерусалим, и тамо прия его святая и предивная Мелания римляныня, бывшая честнейшая в римских госпожах, ея же сынове и внуцы первии по цесаре. У сея же дивныя божия рабы человеком дивное житие Евагрий поживе и тамо многая дивная и полезная словеса и о женъских беседах написа.

Wielkie Zwierciadło Przykładów [ed. Kraków, 1621], Nawrócenie, III.

• FemmeWomanFrauMujerDonna
• TentationTemptationVersuchungTentaciónTentazione
• JérusalemJerusalemJerusalemJerusalénGerusalemme
• TentationTemptationVersuchungTentaciónTentazione
• VisionVisionErscheinungVisiónVisione
• angeangelEngelángelangelo