О учащихся злым чародейским книгам и чернокнижным наукам. В Толете граде Гишпаньского государства удивлению достойное дело сотворися. По обыклости бо тамо живущих от многих стран в сие господарство учения ради приезжаху. В сем же граде Толете между добрых училищ училище чернокнижным наукам, юноши же неции от Свении и от Баварии в сем училищи дел неприязненых учахуся и во учении том дивныя и ко уверению неподобныя речи слышавше. И аще се еже им учитель сказует правду сведати хотяще, приидоша к нему и рекоша: «Учителю, хощем дабы то, чему ты нас учиши и неятоверное нам и дивное возвещавши, дабы явственно и очевидно нам показал еси, того ради да не обольстимся, аще будет или ни к пользе и по житию нашему». Учитель же их, слыша от них сия, всякими образы и хитростными словесы не хоте сим показати сие, да не избегнет кто от них, отрицался. Последи же нуждею приневолен от них и склонися на сие, избра день и прирече в той показати действо дел сатанинских. Егда же прииде день нареченный, изведе их вне града на поле и мечем своим черту круглую окрест их сотвори, завеща же под лишением здравия живота, да пребудут в черте со всякою твердостию и безстрашием непоступно, ниже какову льщению и страхованию поднадати, и ниже что прияти или подати, со всеми силами укрепитися и от всего охранялся, стояти. И тако во окружении оном утвердив их, отиде вмале подале, нача проклятою наукою своею демонов призывати и многое множество обычаем воинских полков демонов показася. Обступиша же круг оный, начаша ко юношам приступати, из луков и пищалей замеряти, копиями верзати и мечьми, близ приезжающе, наполы хотяще их разсекати и всеми образы устрашающе нестерпимо хотяще сих из черты изгнати. И не учинивши по своему зломыслию сим образом воины злобы своея, действо применишася, воинство же яко отиде. И приидоша лики девиц прекрасных, не удобь сказуемых лепотою, зело украшены одеждами, и начаше тонцы строити, и всяко преблажняти, юноши к себе позывающе. Едина же от них прекраснейшая изобретши единаго от них улюби и непрестанно к нему приступала, позывая с собою плясати и между собою лобызание дати, подая же ему многоценный и дивно устроенный перстень и тако от внутрь распали его к себе любовию, тела своего льщением и прегибанием, от вне же улакомися доброты видением, и тако прельсти юношу, ибо не утерпе в округлости стоя, руку от нея же палец к возложению перстня за круг оной девке простре. И абие от тоя восхищен из оного круга в мепновении ока и к тому клеврети его не узреша. Итако собрание оно бесовское корысть получивши в ветр применися и не явленно сотворися. Видевше же оставшии ученици юноши онии клеврета своего восхищенна от врага, страхом великим объяти быша, начаша друг друга держатися и вопити. Слышав же сие, учитель их прибеже, понося нетерпению их. Они же, узревше его, начаша лаяти и злословити о погибели товарища своего. Он же рече им: «Нестьмь аз о погибели вашей ходатай, вы мя принудисте и заповедь мою преслушасте». Ученицы же паче лающе его рекоша: «Аще нам не возвратиши его, то на сем месте мечи тя разсечем». Сия учитель их слыша, убояся погибели живота своего, обеща им клеврета их возвратити. Поиде же и призва началника тмы и князя всякой неправды, напоминая ему работу свою и предъявляя службу свою. «И аще, рече, клеврета их не отдаси, то и всей моей науке велия препона имать быти и служба, яже к тебе от человек многая престанет». Старый же враг сие слышав возжалеся о служители своем, рече: «Заутра на сем месте совет сотворю с своими и егда како желание твое исполнится, точию не забывай к себе добра моего». Заутра же злоначалнаго врага повелением на сейм оный многое множество злобных духов прибыша и предложена печаль и челобитье оного дел их учителя, и еже хощут ученицы его убити. И вопрошени от князя своего, чесо ради толикое насилие юноши сотвориша, противная же страна противу вопросу отвеща, яко никия же сотворихом силы, но сам сему виновен, ибо мастера преслуша и завещания о крузе не сохрани. И тако многими словесы стязующеся. Началник их на некоего стара показа и рече: «На тя елагаем строй сей, како присудиши, тако и буди». И той востав ко всем рече: «Аз умыслих и повелеваю отдати юношу учителю его». И князь их и старейшина повеле двернику: «Отдай, рече, немедленно юношу, ибо налегают на учителя клеврети его. К сему повелеваю». И весь сонм склонися и но велению их ученик без закоснения отиде из геенны возведен и приведен пред князя тмы и погибели. Князь же демоньский отда его учителю, и все собрание оно разсыпася. Учитель же яко сокровище велико ученика обрете зело урадовася, но вмале познаваше его, ибо яко мертвец много времени во гробе лежащ видеся. Приведе же его ко клевретом его, узревши его, зело ужасошася, бе бо видение его страха и умиления полно, и едва познаша его, веема суща изнуренна и истомленна. Сей едва в память прииде сверстником своим еже видев в геенне страшныя грешником муки с великими слезами и умилением исповеда, а паче яко зело сие злое и проклятое учение над вся грехи мерзско и досадително богу, и тако клевретов своих увеща остатися от таковаго злаго начинания и учения и во страсе божий жити, сам же оставя все бысть монах крепкожительный и добродетельный.

Wielkie Zwierciadło Przykładów [ed. Kraków, 1621], Zaklinanie, I.

• magiemagicZaubereimagiamagia
• TolèdeToledeToledoToledoToledo
• MaîtreMasterLehrerMaestroMaestro
• étudiantstudentStudentestudiantestudente
• DémonDemonDämonDemonioDemone
• cerclecircleKreiscírculocerclio
• illusionillusionVorspiegelungilusiónillusione
• EnferHellHölleInfiernoInferno
• ConversionConversionBekehrungConversiónConversione

Tubach Frederic C., 1969. Index exemplorum. A Handbook of medieval religious tales, Helsinki.:

• #1071A : Details for this Tubach reference were not found in catalogue.Les détails pour cette références à Tubach n’ont pas été trouvés dans son index.Details zu dieser Tubach-Referenz wurden im Katalog nicht gefunden.I dettagli per questo riferimento a Tubach non sono stati trovati in questo repertorio.Los detalles de esta referencia de Tubach no se encontraron en el catálogo.