Над танцующею взя власть диавол и еже точию восхитит ю, божия же матери призыванием и поздравлением избавися. Пишет Иаков учитель Картуазин, бысть, рече, жена некая, ко пресвятей богородице зело благоверна и чад своих к ней в сей вере утвержая, учаше, да во всяком. объстоянии и злых пригодах, и аще что получити хощут, яко милостивую и скорую помощницу богородицу да призывают, приносящи глас радования и архангельскаго поздравления. Сия жена дщерь безстудну и сквернохотну и тонцовати охочую воспита, ю же от сего и великим наказанием отвести не возможе, понеже сию отец паче инех чад своих любляше, яко бяше красна и лепа телом, и сотвори ей всекрасную и богатую одежду. Сия же во един святый неделный день от тонцов вертения утрудившися, поиде в сад свой и седе под единым древом, хотя охладитися. И се дух нечистый показася ей, рече: «Востани и иди за мною». Она же вопроси его: «Ты кто еси?» Он же отвеща: «Аз есмь демон, ему же еси верою служиши и оружием нашим еси и сетию на ловление душ, и сего ради воприимеши муки не точию за грехи твоя, но и за грехи всех, их же одеянием тела твоего и украшением и тоннами и вертением ко злому желанию привела еси». И се рекши, хоте ю восхитити. Она же напомяну матерне наказание, возопи к пресвятей богородице, глаголя: «Мати божия, дево Мария, помози ми». И с тем же гласом рече: «Радуйся, обрадованная, господь с тобою» и прочая. Слышав же сия, диавол рече к ней: «Проклята буди та, кая тя сей молитве научила, ея же аще бы рещи не поспешила, то праведным судом в гееньский пламень сего же часа ввергл бы тя, иде же бы с сверстницами и с сверстниками своими юноши и мужъми, и женами, и девками, иже во играх и тонцах и плясании утешалися, и за еже красотою твоею и упещрением к злым помыслом и ко греху приводила, достойныя тебе вселютыя муки понесла бы еси вовеки». И сия изрекши, демон исчезе, девица же, познав помощь и дивное человеколюбие божие богородицы, в словесех архангельскаго ей поздравления велие ей благодарение теми же песньми принесе, и никогда же от сего до кончины своея преста, тонцования же и вертения преста и покаяся пред некоим иереом, ризы же красныя отверже и вся прикрасы отложи, и обычай кротости смирение же и покорение восприя, пресвятей своей помощнице богородице верно до кончины своея служа.

Wielkie Zwierciadło Przykładów [ed. Kraków, 1621], Taniec, XIV.

• filledaughterTochterhijafiglia
• FilleGirlMädchenMuchachaRagazza
• DanseDanceTanzDanzaDanza
• Ave MariaAve MariaAve MariaAve MaríaAve Maria
• DiableDevilTeufelDiabloDiavolo
• jardingardenGartenjardíngiardino
• ApparitionApparitionErscheinungApariciónApparizione