О преславном украшении жен. Бе некая жена во граде Париже зело светолюбива и презелное тщание име о украшении своего тела. Сия часто суровыми словесы отца духовнаго учима и наказуема, она же поправитися не восхоте. Сия видев, добродетелный отец ея духовный от божия лица рече к ней: «Вся пестроты твоя, вся прекрасная и пребогатая украшения и оздобы твоя, жемчюг, и камение драгое, и просто вся, ими же украшаешися и пестришися и вапишися, ничто же ино, точию бронь и оружие, мрежи и сети диаволи, еже имеет на ловление и отторгание от бога многих душ, о них же Христос откупитель наш, сын божий, кровь свою излия и обручи себе. Ты же, прельщая и ловя, силно от рук его изрывавши и бесом в руки предавши». Жена же, услышав страшная речения сия, страхом великим объяся и ревностию великою, в горячести духа благочестно и благоверно падши к ногам отца духовнаго, тако рече: «Молю благость господа нашего и бога еже аще что непотребное тело мое противу воли его носило и аще то украшение наше оружие и сети на ловление душ и любезное веселие диаволе есть, буди, яко свое лукавый дух он в видении всех да возмет». И яко сие точию изрече, и се при всех зрящих и слышащих бывших во храмине оной, идеже жена она при ногах учителя и отца своего духовнаго лежащи, некая страшнаго вида стень показася и рукою незнаемою и неслышанною нача с нея вся украшения отбирати, иже на главе и на выи — усерязи, и мониста и монелла, и жемчюг великий и дивное камение многоценное, вся приправы и вещи драгия, и остави ю точию во единой срачице. И егда точию тако сию остави, слышаша вси, иже вне церкви и во церкви на воздусе глас глаголющ: «Се сети, се мрежи, се сильца, се поножи, ими же души человеческия ловим». И тако пребогатое оно и всекрасное украшение из очес человеческих исчезе и ничто же к тому обретеся. Сие видев, благородная она и богатая жена всецелым сердцем ко господу совершенно обратися и исповедася всех своих грехов прешедшаго жития, прочая же лета живота своего добродетелно и благоугодно поживе в милости к нищим и в щедротах к неимущим. Дай Христе боже, дабы сия жена прикладом своим написала на сердцах обоея плоти мужей и жен, иже суетными сими себе облагают!

Ce récit est sans doute un ajout de la traduction russe.

• FemmeWomanFrauMujerDonna
• PrêtrePriestPriesterSacerdotePrete
• VêtementClothKleidungVestidoVestito
• bijoujewelJuweljoyagioiello
• DiableDevilTeufelDiabloDiavolo