Кесарь Филипп щапливаго мниха обличи и посмеяся ему. Некий честный и силный человек монастырь некий преобиде,— многая стяжания его взях. Началник же монастыря оного и братство умыслиша послати бити челом Филиппу кесарю единаго из среды себе монаха бывша благоплеменита, помышляюще, яко кесарь скоро умолен будет от него, сродник его ради. Монах он юный, а к тому дмеся о чести родителей своих, иже при кесаре, облече на ся изрядныя монашеския ризы и сапоги зело теснии, прииде к кесарю, и оповедаша о нем, и пущен бысть; нача же он милости просити. «Милостивый господарю! Дворянин оный (имя его рече) обитель нашу зело оскорби: всякия беды злобу нам и убытки сотвори, и ныне непрестанно нас нищих озлобляет, скудость нам велию сотворяет. Молим твой правосудный престол общее наше смиренное собрание, дабы ты, яко правосудный господарь, взирая на божие мздовоздаяние, оному от насилия и обиды воспретил и еже от обители восхитил навратити приневолил». Сия кесарь внимая, присматривая же ся щапливым сопогам и одежды его чистоте, рече к нему, вопрошая: «Кто еси ты?» И юный монах отвеща: «Аз есмь оного честнаго человека сын». И кесарь рече: «Вем отца твоего, яко есть честен муж». И к сему паче обнадежися монах и рече: «Воистинну, милостивый господарю, еже есмы имехом, все у нас силник оный отъя!» И кесарь рече: «Вижду, правое челобитье твое, ибо обиду вашу и скудость сапоги твои показуют,— мню, яко ни кож, в них же сапози шити, остави, ибо аще бы довольство кож имели, не бы такови теснии сапози твои были. Обаче и се помышляю, яко густота риз твоих и обилие являет и в сих паче обоих вижду, яко преобидено от вас звание ваше: в тесноту позвани есте, а не в щапство, и елико ты по отце благороднейший, толико должно быти тебе, ему же обещался еси, во смирении работати отцу небесному благопокорнейши и еже единою отречеся чесого, сего всегда должно тебе охраняти себе. Но да не тяготно ти будет наказание мое, ибо твоего ради исправления се рекох. Возвратижеся в монастырь и внимай спасению твоему. Оный же, иже насилова вам, наградит вам сугубо».

Wielkie Zwierciadło Przykładów [ed. Kraków, 1621], Suknia abo szata, VIII.

• RoiKingKönigReyRe
• MoineMonkMönchMonjeMonaco
• VêtementClothKleidungVestidoVestito
• reprochereproachVorwurfreprocherimprovero
• VanitéVanityEitelkeitVanidadVanità

Tubach Frederic C., 1969. Index exemplorum. A Handbook of medieval religious tales, Helsinki.:

• #3739 : Philip, King, reproved monk for leggings. A Black monk, who had been sent to King Philip to report the attacks of a knight on the monastery, was reproved by the King for wearing tight leggings. Alpha # 10; CHeist-IV #12; 13; H354 # 47; Recull # 8. (© Frederic C. Tubach)