Покаяние без престатия грешити не помогает тако и кающемуся без поправления и живуща во гресех молитва и приношение мертвым не помогает. Некий отец сына име совершенных лет и пришед до замеренных лет и часа преставися. Сын же оставльшийсн 32 лета за душу отца своего особые молитвы за упокоение ея и многое помяновение творя. И егда преидоша тыя лета, показася ему отец его и рече: «Добро, сыне, тщание твое о мне и многотрудно мне и немощно, есмь бо в муках». Слыша же сие, сын, во ужасе рече: «То не поможаше ли о тебе 32 лета приношение мое и молитвы?» Отвеща отец: «Ни, сыне, нимало не помогоша». И сын паки рече: «Но разве от осужденных еси навеки?» И отец отвеща: «Ни, ибо ничто же смертно погреших, и елико согреших — покаяхся, но яко человек несвято пожих». И сын паки рече: «Како же, отче, не помогоша ти молитвы моя?» Отвеща отец: «Понеже ты во вся леты во гресех тяжких и смертных пребываеши!» И сын рече: «Како, отче, сия о мне глаголеши? И аще аз согреших, но на кийждо год каяхся грехов своих и святое приимах причастие». Отвеща отец. «Аще и на всяко лето исповедахся и ко святому таинству приступал еси, но недостоин сый ко страшней и пречистей тайне смел еси приходити, ибо желание твое о покаянии не усердно и не истинно, тем же и безтаинственно, ибо творил еси та не страха ради божия и любве ради к нему, но по обыкновению и стыдения ради, и того ради всегда покаяние твое на последние дни святаго поста отлагал еси, когда уже далечайши отвлещи не могл срама ради, и исповедався, ни в чем себе не поправил еси. Того ради господь бог не отпустил ти ни малаго греха». И се изрекши к сыну, отец неявлен сотворися. Сия сын слышав, в зелный страх и в неизреченную печаль прииде, восприем же во уме истинно покаятися и отставити вся, и тако сотвори с великим сокрушением и со излиянием многих слез покаяся и иде в монастырь пострижеся, и во обычаях добродетельных преуспе, и тако благочестно за отца своего моля, в мале времяни отпущение грехов исходатай и царство небесное и себе от вечнаго осуждения избави.

Wielkie Zwierciadło Przykładów [ed. Kraków, 1621], Spowiedź, XXXIII.

• PèreFatherVaterPadrePadre
• FilsSonSohnHijoFiglio
• PrièrePrayerGebetOraciónPreghiera
• ConfessionConfessionBeichteConfesiónConfessione
• contritioncontritionReuecontricióncontrizione
• PéchéSinSündePecadoPeccato
• ApparitionApparitionErscheinungApariciónApparizione
• DéfuntDeadVerstobenerDifuntodefunto