Богохульник некий воин знаменитый от мухи победися. В Гришпании некий человек воинскаго чина вда себе в костырьския утехи и проиграв вся. Печалию объят бысть о погибели сребра своего, нача просити господа бога, от сердца своего, да даст ему свое паки отъиграти, обаче же паче моляшеся, то паче тщету приобреташе себе и идеже отъиграти тщася и уповая, яко уже свое получит, тамо и последнюю ризу проигра и с великою срамотою изыде. И виде неполучение свое окаянный, нача на бога хулу приносити, зане ему в злой его воли не вспомогал, не разумея в себе безумный, яко благость божия грехом не поблажает. И тако в великом разгневании прииде в дом свой и облече на ся броня, и шлем и вседе на конь, и приеде, идеже собрася мужественных много, ко всем сим яко изумленый рече: «Аще кто любит бога и верен ему, и кто речет, яко есть бог, той да возложит на ся броню и приимет оружие и станет противу мене во имя бога своего. Аз же без бога убию его, и познают вси, яко несть никоего бога!» Удивишася и ужасошася вси слышащий же сие и начаша порицати и злословити окаяньство его, но ни един никоеже слово к нему провеща, да не сообщится в каковом любо слове греху его. Но иже никто же ему отвеща и ратоватися не восхоте, бог же абие отвеща и яко же противящагося силе его гордаго фараона, не львы, не медведи, ниже пардусы, ни инороги казня, но мухами и комарами и жабами, тако и на сего безумнаго посла едину муху, аще тогда и зима бе. И сия тако лице его осели и тако его под шлем яко копией ядлицем своим колола, иже не возмогл лютости терпети, шлем свой поверже о землю, но муха возыме волю яко ко граду приступала, башню збила, толико его в лице и в чело колола, он же никако же возможе себе оборонити ударися с коня о землю и лице к земли приложи, трься сим по ней, но муха и тамо с копией своим мужественно доезжала и непрестала, дондеже с великою скорбию и лютою печалию, и с воплем и слез пролитием хулы своея отречеся и каяся рече: «Бог есть истинная бытность, си речь естество, безначален, предвечен и бесконечн, бог истинен и вси дела его суть, вся тем бысть и без него ничто же бысть и не хотя мя, глаголя, вящшим создательством силы своея и творением коим казнити, но на вящшую мою срамоту мухою единою знаменитаго мя воина победи». И точию сия изрече, муха же она к тому не оскорби его, и иже при нем быша,' хвалу богу воздаша, иже есть благословенный во веки веков, аминь.

Wielkie Zwierciadło Przykładów [ed. Kraków, 1621], Bluźnierstwo, VIII.

• ChevalierKnightRitterCaballeroCavaliere
• JeuGameSpielJuegoGioco
• BlasphèmeBlasphemyLästerungBlasfemiaBestemmia
• MoucheFlyFliegeMoscaMosca
• combatfightKampfcombatecombattimento