В горней Вифаиде бысть монастырь девическ, в нем же вящьши двою сту инокинь пребываху. Бе же той монастырь жизнен и богат, и уставами иноческими добре утвержен и добродетельми цветущ, но едино в них злое дело восплодися и урасте и вся помрачи и огорчи: злый бо обычай имяху, иже ни единыя во обищество свое не припущаху, точию аще кая нарочитое стяжание сребро не принесет, иже есть аще кая вкладу не даст - не постригаху. И тако не ради христовы любве, его же им в лепоту паче мирских исполнения закону исполняти, они же взором человеколюбия, милости и желанием богатьства и сребролюбия омрачаеми, обещавшися последней подлагати себе нищете, з богатьством приимаху. В том же монастыре бяше инокиня подвиги добрыя прошедши от детства своего во многих добродетелех в старость пришедши. Сия едина точию сею виною не победися, но всегда сим грехородным начинанием гнушаяся и прочим о сем не терпя глаголаше, обличая безчеловечный нрав. Сей святей инокине во едину от нощей молящейся, явися святый во отцех великий Иероним в велицей светлости, повелевая, да возвестит игумении и сестрам, аще от сего греха зело гнустнаго богу не отступят и не исправятся, велию и лютую на ся узрят казнь божию, и се рекши, невидим сотворися. Инокиня же страхом великим объяся, не ведая же, кто в таковей светлости явися, приложи труда имолитвы, бояжеся возвещенное скрыти, рано востав, в камбан удари почасту. На сей же глас началнейшая и сестры стекошася, она же взвести им видение свое и еже повеленио возвестити, яко аще злого сребролюбнаго нрава святокупства не отрекутся и от сего себе не исправят, то велий нф ся гнев божий узрят. Слышав же сие, началница и протчии глаголы ея в смех обратиша и на ню вси возопиша, яко стара сущи из разума изъступила, безвестное бредит. Святая же она старица, приимши понос и хуление, радовашеся, о погибели же на место и сестр зело плакаше, принося великому богу молитвы слезныя, да отвратит праведный свой гнев. По десяти же днех в полунощи святей оней молитвы своя прилежныя господеви простершей, паки той же явися возвещая монастырю погибель, верно слово утвержая, повелевая игумении и сестрам возвестити, да от ненависнаго богу греха престанут. Инокиня же она в надежды божий страх отложивши, вопросы святого: «Кто ты,- рече, господи мой, иже сицевое страшное сказуеши на обитель нашу и сестрам моим возвестити повелевавши?» Он же отвеща: «Аз есмь Иероним!» И сие изрекши, невидим сотворися. Инокиня же она, аще и ведаще закаменелость сестр и упорность, воляше от них буею вменятися, неже божие повеление преслушати, паки в камбан удари, паки вси сестры совокупишася, и точию она о сем нача уста отверзати, они же вси злоносно ей глаголаша и заплеваша и со смехом отидоша. Она же, вшедши в келлию свою, паки на слезную молитву уклонися и в том премедлися три дни. В четвертый же день святый Иероним, окружаем ангельскими полки во светлости велицей, ста при инокине оной и рече: «Изыди со тщанием из обители сея, прииде бо на ню повеление гнева господня». И паки рече: «Не косни, но скоро изыди, да не погибнеши и ты с прочими, достойными гнева Божия» Инокиня же она с рыданием слез вержеся на землю, милости прося пощадения, да праведный гнев отвратится. Иероним же святый рече: «Еще вмале воля божия потерпит! Иди и рцы наставнице презорливей и окаянней и сестрам безчеловечны да покаются о злобе нестерпимой богу и да отрекутся продавати святое; аще ли же твоими словесы возгордят, то ты никако же косни, но изыди скоро, да не погибнеши купно с ними». И сие изрек неявлен сотворися. Инокиня же она в велицем страсе и ужасе прибеже, напрасно и тяжко в камбан звяцая. Авватиса, сии речь, начальная мати услыша и позна, порицая глаголя: «Се паки бешеная она юродствует!» И пришедши к ней, лая ю и понося с великим гневом, претя и грозя казнию и из монастыря изгнанием. Святая же она инокиня рече: «Молю тя, духовная мати, сотвори ми, им же грозиши, но и сама изыду. Снятый Иероним возвещает, а не аз, яко суть мести божия на место сие и на нас за грехи наша - святопродание лиется» Сия слыша, авватиса нача осклаблятися и, призвавши вратницу, повеле ю вне монастыря изринути. И приказа ей: «Егда, рече, исправится и покается, тогда пустити ю». Инокиня же о своем избавлении радовашеся духовке, а их же погибели поливая землю слезами изыде. И что сотворися: точию за праг монастыря преступи, страшное яко ко небу земли рвение, трясение и колебание з зелным шумом и громом сотворися, и монастырь оный запалися и сквозе землю проседеся. И тако наставница и сестры бедно погибоша, токмо знак проседения казни их всем явственно оставиша. Инокиня же святая, не приставшая беззаконию их, видя гнева божия збытию, горно оплакуя обитель и сестр, прииде во ин монастырь.

Wielkie Zwierciadło Przykładów [ed. Kraków, 1621], Świętokupstwo, II.

• Saint JérômeSaint Jeromeder heilige HieronymusSan JerónimoSan Girolamo
• MonialeNunNonneMonjaMonaca
• SimonieSimonySimonieSimoníaSimonia
• AvariceAvariceHabsuchtAvariciaAvarizia
• VisionVisionErscheinungVisiónVisione
• avertissementwarningWarnungadvertenciaavvertimento
• tremblement de terreearthquakeErdbebenterremototerremoto
• destructiondestructionZerstörungdestruccióndistruzione