Отец с сыном в муках взаемно себе проклинают. Некий от совершенных святых отец восхоте известитися о осуждении и мучении грешных и хвале святых и радости небесней, и о сем щедроты божия слезами облагая и прося. Скоропослушный же бог услыша и посла ангела своего, иже пришед поя его и приведе в страшная мучения осужденных. И между различными муками виде отца с сыном в несказанных муках томимых и нестерпимых дручимых, и от величества несносных мук друг друга проклинающих и злословящих. Отец к сыну глаголет: «Проклят ты буди и час оный, в него же тя восплодих, ибо тебе ради все злое пред богом творих, его же создателя моего забых, лихоимцем себе сотворих, клятву и клятвопреступление нивочто же вмених, к подручным немилостивей бых и всякую милость оставих, да ты будеши в житии твоем в мире и во благоденьствии, в покои, в радости, в сладости». Сия и сему подобная злореченная отец сыну приносил. Такожде и сын противным обычаем рече отцу: «Проклят буди день он, в нем же ты сотворил мя, отец, ибо закона божия и заповедей его не учил еси мене кая суть и како та соблюдати. Слова божия и учения слушати возбранял еси и к проповедающим не допущал еси, ниже о царьствии небеснем когда предложил еси, ниже муками, в них же ныне зле мучимы, погрозил еси, никогда же о исправлении моем попеклъся еси, точию учил еси мене в гордости пребывати, одеждами украшатися, в злых обучениих, во лживых словах и превратных обычаях. И видев мя зле творяща, не казнил мя еси, и того ради осужден есмь навеки!» Сие показав, ангел божий старца вопроси: «Что се, еже видиши?» И отвеща старец святый: «Зле, господи, и видети, и слышати не могу!» Тогда ангел божий оттуду его отведе и приведе в веселие праведных, и тамо таковым же способом виде отца с сыном зело радующихся и друг друга объемлющих и любезно лобызающихся. И глаголет сын ко отцу: «Отче мой любезный и благословенный, буди вечное благословение имети от славы величествия божия, понеже прилежное попечение о добронравии моем в воспитании имел еси велие рачение, дабы научен был и страх божий имел, ко церкви божий притекати, слова божия проповеди слушати всегда мя понуждал еси и всегда казнил мя еси, никогда же в чем преступник явился, и тако научил еси мене волю божию творити, располагая, что противно воли его и что любезно ему, — и от сего научихся боятися его, и сих всех ради твоих о мне благодейством обретох сие желаемое святым и праведным веселие и радость неконечную, но присно пребывающую, услаждающую во веки». Слышав сия от сына, отец подобно нача вещати, како в послушании его бе усерден, колико добронравен и зело богобоязлив. И таковая и подобная сим благословия друг другу прилагающе, неизреченною радостию радовахуся, неисповедимых щедрот божиих наслаждающеся. Сия показав, ангел божий рече: «Како о сем возмнеся тебе?» Он же отвеща: «Благословени суть сии и вси, иже зде уготоваша жилище себе». И по многих и великих показаниих старцу небесных тайн, ангел божий неявлен сотворися.

Wielkie Zwierciadło Przykładów [ed. Kraków, 1621], Rodzicy, IX.

• PèreFatherVaterPadrePadre
• FilsSonSohnHijoFiglio
• VisionVisionErscheinungVisiónVisione
• angeangelEngelángelangelo
• EnferHellHölleInfiernoInferno
• ParadisHeavenParadiesParaísoParadiso

Tubach Frederic C., 1969. Index exemplorum. A Handbook of medieval religious tales, Helsinki.:

• #5027 : Usurer and son in hell, curse each other. (See also: 1481). Enx (G) # 384, # 385; H53 # 84, H180 # 14, H410 # xiii, H458 # 3, H504 # 12, H531 # 41, H559 # 248, H595 # 142, H684 # 40, H592 # 116 var.; Pelbart # 5; Seelentrost (German) 21, 1; 249, 3; Spec. Laic. 575, # 579a (Welter); Thrøst (Swed.) 363, 13; S.T.: Q273.4.– Hauréau, III, 129; IV, 168; Jacob’s Well # 81; Pat. Lat. 145, col. 433; Romania XIII, 36. (© Frederic C. Tubach)