О силе крестной и о лести бесовской. Призиньскому царю Рафбоду показася во сне диавол во образе ангела светла, на главе своей имея венец злат з драгими камении и жемчюгом и в светлей ризе, и глаголет Рафбоду: «Мужу всечестнейший, кто тя прельсти и отторже от службы богов? Не твори, яко же тя учат христиане, но пребывай в них же научен еси. И аще тако, яко же прежде, начнеши творити, богом служите, то дам ти жити во веки чертоги златыя, их же скоро прията имаши. Призови же христианска учителя Вольфрана и известишися, кия суть обители вечныя светлости, их же аз тебе обещаю. Но известно о сем сказати не может, да будет же иже от обою страну пошлете видети жилища та всезлатая, аз же вождь им буду и покажу, их же обещаю». Возбнув же от сна Рафбод и возвести сие святому Вольфрану. Он же ему отвеща, яко хощет сатана прельстити его и в погибель привести. И рече царь: «Аще оно все прекрасное пребывание бог мне покажет, то неотложно буду христианин». И посла царь от себе человека единаго, святый же Вольфран диакона своего посла, и егда цареву человеку и диакону от града вмале отшедшим, обретоша на пути человека, иже им рече: «Потщитеся скоро итти, аз вам покажу чертоги зело пречюднии, их же царю Рафбоду уготовах». И тако показася им широкою дорогою и незнаемыми ими месты ити, узреша путь различными мраморами и мусиею пречюдно устроен. Узреша же и палаты всезлатыя и чертоги пресветлыя прекрасныя. Приидоша же на площадь, иже пред чертогом, и та вся от злата и камения драгаго светяся. Внидоша же в великий дом, предивно убранный и украшенный, и престол в нем великий узреша. Тогда провожатый рече: «Сицевое пресветлое жилище и всекрасное пребывание уготовано царю Рафбоду». Диакон же видя удивися, помышляя, коея ради правды такое обиталище царю непросвещенну уготовано бысть? И на мног час удивлялся, рече: «Аще всекрасное жилище по воли божией и бог е назда, да пребывает вовеки, аще ли же ни, да нивочто же обратится». И за сим словом возложи на ся рукою своею крестное знамение. И абие вождь оный пременися в демона, чертоги златыя в гнусное блато. Диакон же и царев человек обретошася посреди самого блата, идеже самая глубина и дрязг и хврастие. И в таковем злоноснем блате три дни и три нощи с великим мучением ходивши, и едва в пятый день во град приидоша и царя оного обретоша уже умерша. И возвестиша сия, еже збыся о них, архиерею Вольфрану, и царев человек учением святаго Вольфрана прия святое крешение и вскоре прия монашеский образ.

Wielkie Zwierciadło Przykładów [ed. Kraków, 1621], Diabeł, XII.

• RoiKingKönigReyRe
• BaptêmeBaptismTaufeBautismoBattesimo
• signe de croixsign of crossKreuzzeichensigno de la Cruzsegno della croce
• illusionillusionVorspiegelungilusiónillusione
• palaispalacePalastpalaciopalazzo
• DiableDevilTeufelDiabloDiavolo