Град великий и славный заеже милость и любовь в людех угасе от небес нанесением суда огнем потребися. Во околице поморской град некий знаменитый и великий бе, в нем же добраго ни единаго дела нет, точию нечистота, пияньство, ненасыщенное желание имения, лихоимания, клеветы, клятвопреступления и иныя злобныя дела граждан огосподьствоваша. Над вся же лютое человеку ненавидение, немилосердие над сиротами и убогими и пришельцы толико бе, иже или от немилосердия убогим в недуги впадати и от глада умирати, или во иныя грады и места отходити, и конечное рещи никую же никому благость ни малу являху, никогда милостыни не подаваху, от пришельцов же домы своя замыкаху, блазнителем же и лицемером и сокровенная открываху. Ведателно же, яко никакого паче гнев свой бог проливает, точию и долго терпя, над немилосердными немилосердие объявляет. Граждане же, никако же внемлюще страху божию, во вселютую злобу совершенно уклонишася, никако же нимало возставляюще себе к побожности и благосердию. Что же? Воистинну неволею приневолися бог, непреодолеемый во благости, злобою и силою грехов воздати и платити затверделость злобы человеков сих лютою и тяжчайшею злобою. И егда прииде изречение, еже послати на противление отмщение, прежде еще милосердуя, посла ангела своего во град оный. И прииде во время солнечнаго зашествия провозвестник погибели во образе убогаго странника, во общей убозей ризе, образ же имея толико блед, толико умилен, иже аще бы кто и железно имел сердце, волил бы его помиловати и благосердие над ним показати. Но ох! адаманта твердейшая злоба не возможе склонитися на милость. Все врата ангел божий таковым образом объшед, не точию от кого милость получи, но и безчестием и злословием отриновен, и тако тыя злыя объшед, прииде к дому правящаго град он, нача толкатися у врат, просить во имя Христово что вкусити и малый покой в нощь ту прияти. Градодержатель же оный виде его толико умиленна взора, нища, умилосердися, прия его благочестно и уприятова любочестно, ибо начальствуяй сей един токмо благосерд и милостив ко странным, к сиротам же и нищим, седе сам при ангеле, угощая его и любезныя слова вещая. И ангел божий, возбужая его к милости, многая и дивныя словеса изрече, иже паче началник той к милости воспалися. И ангел божий, видев ревность его и непременное благое намерение, воста, прия его за руку и отведе на страну, уча грехи, их же исполни в начальстве, слезами омывати, заповеди и приказание божие сохраняти, бедным, и неимущим, сиротам и странным помогати, «Ибо вси есте, рече, едино тело и уди», над вся же боязнь божию соблюдати и точию в тых себе удержевати. И кончав предание, возвести, яко посол есть небесный и яко град оный за безчеловечество без всякаго коснения повеле бог погубите. Сия слыша градодержатель от страха яко лист вострепета и виде подобие его ино поклонися ко святым стопам его, прося милости о дому своем. И божий небесный посол рече ему: «Не бойся, друже, дом твой при всей погибели на град и между огня пожирающаго и поядающаго камение всецел будет, домом бо милостивым, рече, не прикасается тля, но злоба и немилосердие подобным восплатится». И сие изрекши, из очес его изниче. Заутра же слышано сотворися от судии града, еже кое прия извещение и что им будет за жестокосердие. Граждане же не точию к покаянию склонишася, но и благочестивому своему правителю начаша смеятися, глаголюще, иже даде себе некоему беглецу прельстите. Не по мнозе же времени жестоко и страшно нача гремети, и небо тмою помрачися, лютое стремление казни показуя. Блискавица же, яко пламень над градом ста, от потужности громов земля нача дрожати и отвсюду град возгореся, брамы, а по нашему словут башни, стены и высокий домы и всякое здание едино пламя сотворися, и вся без малаго остатку потребися. И не точию камение поядая, но и подземная сокровища изницая, человеков же малая часть, кающихся, за град убегоша, вящшии же и вси ту от огня погибоша. Градодержателя же дому ни дымная воня коснуся. И тако гнев божий по многи дни едва усмирися. Таковым показанием возбуждает бог человеков от злых покаянием обновлятися и в добродетелех устроеватися. О кольми паче милостивым быти и имение с нищими делити, и еже в нашествии гнева божия милость получити.

Wielkie Zwierciadło Przykładów [ed. Kraków, 1621], Miłość nad ubogiemi, XXIII.

• villetownStadtciudadcittà
• PunitionPunishmentStrafeCastigoPunizione
• hospitalitéhospitalityGastlichkeithospitalidadospitalità
• PéchéSinSündePecadoPeccato
• angeangelEngelángelangelo

Tubach Frederic C., 1969. Index exemplorum. A Handbook of medieval religious tales, Helsinki.:

• #1086 : City, sinful, destroyed. In reward for his hospitality, a man’s house is left standing when a sinful city is destroyed. (See also: 1083). Alpha # 368; Recull # 318. (© Frederic C. Tubach)