Зломысленнаго врага в виде странника нища некий в дом свой прия и сына его во огнь вверже. Честный епископ Фартунат Турдельский силою слова божия изгна от некоего человека нечистаго духа. Злобный же той дух, егда вечер прииде, зломышленно претворися во образ странна нища пришельца и вся улицы обходя вопия: «О, честнии мужие, мнимый от вас святый и великий епископ Фартунат зрите, что сотвори: странника из обители своея отрину и сице ищу, кто бы мя милостивне приял в дом к себе и не обретаю никого во граде приятна себе». Сей глас человек некий слышав и печаль телесную, иже в сие время седя со женою своею и с сыном, иже единаго имея, при пещи горящей. Призва его и вопрошая, что ему епископ сотвори, он же яко бы к нему умилися, негодуя на епископа, дабы ему приступ и место у себе имети, посади его подле себе при пещи, и егда между себе негодова, вступи проклятый в сына его мала суща, иже вверже его в пещь горящу. И абие человек, погубивый сына, позна кого прия и кого епископ изгна. Отсюду показуется, яко многая мнимая вами творима добрая не суть же добра, понеже много якобы добро творим, но без добраго умышления, не точию приятны, но и зело суть богу мерския, сего ради и спаситель наш рече: «Аще око твое зло , темно будет и все тело». Аще зло ума намерение упредит, всякое управление, оттуду исходящее, зло и неприятно, точию тме началнику любезно, аще и видом добродеяния показуется, ибо человек оный, иже своего ради начинания сына погуби, показует казнь его, яко не бога ради и благочестия сие сотвори приятие, но ради увлачения чести и славы епископа, яко бы добродетелнее епископа. Суть бо мнози нецыи притворно что доброе творят, дабы чюжую славу погубил и затмил, а не ради сего, иже имети воздание и мзду и утеху от бога, но точию о сем радость их, даже добрую чию славу ни во что же вменят и помрачат. Сего ради уразумехом, яко человек оный, приимый злаго духа в гостя, показати по себе хоте, яко вящее сотвори над епископа, понеже того прия, его же епископ изгна.

Wielkie Zwierciadło Przykładów [ed. Kraków, 1621], Gości przyjmowanie, IV.

• FortunatFortunatFortunatFortunatoFortunat
• exorcismeexorcismTeufelsbeschwörungexorcismoesorcismo
• DémonDemonDämonDemonioDemone
• pèlerinpilgrimPilgerperegrinopellegrino
• FilsSonSohnHijoFiglio
• MeurtreMurderMordcrimenassassinio
• FeuFireFeuerFuegoFuoco
• accusationaccusationAnklageacusaciónaccusa