(Fr.) Le diable tenta un moine au chœur durant la psalmodie, en lui présentant sous les yeux des calices pleins de vin, dont il pouvait sentir l'odeur. Puis, le diable lui vint une nuit sous la forme d'un ours. Vaincu par l'Ennemi, le moine quitta le monastère.

CAPITULUM XCI De Henrico cognomento FikereCP Fig..

Quidam ex senioribus nostris, Hermannus nomine, cantor officio, vir bonus et disciplinatus, ante paucos annos defunctus est. Iste plures habuit visiones, ex quibus unam praesenti loco exempli causa inseram. Cum nuper monachus factus fuisset in Hemmenrode, alium quendam monachum, tara in choro quam in refectorio proximum habebat. Ante huius ora quandoque in choro infra psalmodiam amphoras cum vino vidit. Amphoras, ut dixi, oculis vigilantibus vidit, vini odorem sensit, sed manus tenentes videre non potuit. In quibus ille cogitando delectabatur, haec ante eius oculos opere diaboli formabantur. Vidit etiam et ursum cum dormitaret nocte quadam ante illum erectum stantem, brachia super pectus eius ponentem, cuius os dormitantis auri coniungebatur. Non multo post, secundum quod ei suasum fuerat a diabolo, apostatavit. Neque sine causa diabolus illum per ursum extraxit. Ursus dicitur quasi orsus, eo quod ore fetum suum formet. Et diabolus ita informavit illum scurrilitate verborum, ut ob loquacitatem oris sui tam Regibus quam Principibus multum sit acceptus. Vocatur enim Henricus cognomento Fig. Susceptus a domino Gisilberto Abbate in novicium, mox ut eum per confessionem cognoverat nigrum monachum fuisse, cappam illi mutavit in cucullam. Fertur etiam fuisse in ordine Praemonstratensi. Prius tamen, ut audivi, se feminam simulans, pro femina in claustro quodam sanctimonialium susceptus, quasdam corrupit, et nonnullas impregnavit. Nam usque hodie histrionis officio fungitur, et forte his peiora operatur. Haec de gula sufficiant, quia ad vitium luxuriae festino.