(Fr.) Des voleurs pillèrent l’église Saint-Martin d’Utrecht. Il s’emparèrent, entre autres trésors, d'une croix très précieuse (avec une relique du bois de la croix du Christ) et la confièrent à deux complices. Le matin, alors que l’évêque et les chanoines se lamentaient, les deux quittèrent la ville et échappèrent aux chevaliers lancés à leur poursuite. Le Christ qu'il avaient ainsi insulté, brouilla leurs sens et les voleurs s’égarèrent et se retrouvèrent dans un marais. Arrêtés, ils cachèrent la croix et l’échangèrent contre l'impunité accordée par l’évêque, mais se firent pendre ailleurs après avoir tenté dès le lendemain de voler dans une autre église.

CAPITULUM XXI De furibus qui in Traiecto crucem furati sunt et suspensi.

Apud inferius Traiectum hoc anno sacrarium in ecclesia sancti Martini fures effringentes, quosdam thesauros una cum cruce pretiosissima gemmis et auro decorata asportaverunt. Qui cum essent plues, duobus crucem committentes, ipsi cum thesauris abierunt. Mane cum tantum sacrilegium ad notitiam Episcopi atque canonicorum pervenisset, dolentes valde, maxime de cruce ob portionem ligni Dominici, milites per diversas vias miserunt, qui fugientes insequerentur. Hi vero qui crucem portabant, per stratam publicam incedebant. Ad quos cum pervenissent milites, nil de eis mali suspicantes, pertransierunt. Christus vero in quem peccaverunt fures a sensu alienavit, gressum fixit, ita ut a strata declinantes paludem intrarent, nec tamen motis pedibus procedere possent. Altera vero die praedicti milites reversi, cum eos pene in eodem loco et maxime lutum calcando vidissent, mirati dixerunt: Isti sunt quos heri hic dimisimus. Ad quos cum unus clamasset, boni homines male inceditis, quare non ascenditis stratam tritam? responderunt illi : Bene incedimus, non vos sollicitet iter nostrum. Tunc unus ex militibus Deo inspirante dixit ad socios: Aliquid istud portendit, forsitan rei sunt, teneamus illos. Ad quos cum descenderent, illi crucem paludi immerserunt. Interrogati vero de furto, responderunt: Nos crucem tulimus, ubi sit scimus; sed nisi certi de vita fuerimus, nunquam illam ostendemus. Quid plura ? Ducuntur ad Episcopum, gratia crucis promittitur immunitas, crux ostensa reportatur, extra provinciam conducuntur. Et quia iustus iudex nullum peccatum relinquit inultum, et saepe peccato punit peccatum, permisit ut sequenti die iterum ecclesiam infringerent, in qua capti sunt, et suspensi.
NOVICIUS: Satis evidens fuit hoc miraculum.
MONACHUS: Tanta est virtus crucis, ut et suis contemptoribus ut dictum est inferat poenam, et venerantibus illum restituat sanitatem.