(Fr.) Rudolph, le moine de Loccum, vit une nuit le Christ crucifié lui apparaître entouré de dix moines et cinq frères-convers eux aussi crucifiés. Tous les religieux étaient bien connus de Rudolph. Comme le Christ lui expliqua, ces quinze personnes avaient conformé leur vie à sa Passion.

CAPITULUM XVIII Item de converso de Lucka qui vidit Christum cum quindecim religiosis in aere crucifixum.

In Lucka domo ordinis nostri, cuius in superiori distinctione memini capitulo vicesimo quarto, conversus quidam est, sicut ab Adam eiusdem domus monacho didici, vir bonus et disciplinatus, Rudolphus nomine, cui divinitus multa revelantur. Hic cum nocte quadam dictis matutinis ante lucem sub divo staret, et orationes aliquas diceret, Christum in aere cruci affixum pendere vidit, et circa eum quindecim homines singulos in singulis crucibus. Ex quibus decem erant monachi, et quinque conversi, omnes ei bene noti, utpote congregatio- nis suae professi. Ita aer fuerat illuminatus ex Christi praesentia, ut singulos plene discerneret. Cumque stupefactus staret ob tam mirabilem visionem, Dominus de cruce clamavit: Nosti Rudolphe, qui sint hi quos circa me vides crucifixos? Respondente converso: Novi Domine, qui sint, sed quid sit quod video, prorsus non intelligo; subiunxit Dominus: Hi soli ex omni congregatione mecum crucifixi sunt, meae passioni vitam suam conformantes.
NOVICIUS: In quo se illi conformaverunt?
MONACHUS: Utique in obedientia, in patientia, in humilitate, in abrenunciatione totius proprietatis, propriaeque voluntatis. Haec et his similia monachos martyres faciunt, in quorum persona per Psalmistam dicitur: Quoniam propter te mortificamur tota die, aestimati sumus sicut oves occisionis . Ecce crux, de qua in Evangelio dicit ipse crucifixus: Qui non tollit crucem suam quotidie, et sequitur me, non est me dignus . Non dicit, semel sicut Petrus, sed quotidie sicut Anthonius. Sicut didici nuper a praedicto monacho, omnes illi quindecim adhuc vivunt, excepto uno, qui iam obdormivit in Domino.
NOVICIUS: Nemo claustralium visionem hanc ignorare deberet.
MONACHUS: Verum dicis; quia multi putant se esse monachos et non sunt, ore et non vita dicentes cum Apostolo: Mihi autem absit gloriari, nisi in cruce Domini nostri Jesu Christi, per quem mihi mundus crucifixus est, et ego mundo .
NOVICIUS: Dic quaeso, quomodo nobis sit intelligendum quod idem Apostolus dicit: Qui autem sunt Christi, carnem suam crucifixerunt cum vitiis et concupiscentiis?
MONACHUS: Secundum praecedentia videtur sic intelligendum.