(Fr.) Dietrich, l’archevêque de Cologne, fit bâtir un château sur la colline de Godesberg. Il avait là une chapelle dédiée à l’archange Michel. Un jour, un prêtre venant de Cologne vit l'archange Michel voler du château de Godesberg vers Stromberg où se trouvait la chapelle de Saint-Pierre. En même temps, un homme nommé Théodoric, eut la même vision : il vit, en plus, Saint-Michel transporter une châsse avec des reliques, privant ainsi le château de Godesberg de sa protection car il avait été construit grâce à l’usure d’un Juif. Dietrich, fut déposé avant même que les murailles fussent achevées.

CAPITULUM XLVI De hominibus qui viderunt reliquias montis Gudinsberg transmigrare in Stromberg.

Eo tempore quo dominus Theodericus Coloniensis Archiepiscopus qui adhuc superest, castrum in Gudinsberg aedificavit, sacerdos quidam religiosus a Colonia rediens, cum monti iam dicti nominis propinquasset, sanctum Mychaelem Archangelum in specie bene nota, de eo in vicinum montem qui Stromberg dicitur, in quo memoria est Petri principis Apostolorum, alis extensis volare conspexit. Eodem tempore homo quidam Theodericus nomine, de villa proxima cum uxore ad ecclesiam properans, praedicto monte capsellam cum reliquiis quam saepe viderat, super Stromberg per aerem duci vidit. Ambo illam viderunt, et usque hodie ambo testes sunt tantae visionis. Si mihi minus credis, interroga dominum Wilhelmum sacerdotem de Stromberg, qui se ab ore illorum qui haec viderunt audivisse testatur, et dicet tibi. Habebat enim et adhuc habet sanctus Archangelus in Gudinsberg, vel ut alii dicunt in Wudinsberg, ecclesiam nomini suo consecratam. Et cum esset mons idem fortis satis, et ad munimen provinciae bene situs, nullus tamen in eo castrum aedificare praesumpsit, quia hoc non posse fieri ob praedictam memoriam ab incolis referebatur. Praedictus vero Theoderieus huiusmodi verba non attendens, et castrum in eo aedificans, anteqnam muros eius perfecisset, depositus est. Nec miror si ab eodem castro angelica recesserunt subsidia, cuius omnia pene aedificia ex usuris cuiusdam Judaei quem praefatus ceperat Episcopus sunt constructa. Quam potenter sanctus Mychael electorum animas in exitu ab inimicis defendat, audies in distinctione duodecima capitulo quinto. Non solum beatus Mychael cum ceteris coelestis militiae exercitibus fideles protegit cum moriuntur, sed etiam in praesenti ab hostibus visibilibus.