Thesaurus Exemplorum
Medii Aevi

Frater Gerlacus sacerdos et²⁹⁰ monachus noster propter signa unius devotionis, quam in quodam monacho nostro vidit, sicut mihi confessus est, primum conversionis amorem concepit²⁹¹. Die quadam cum monachus ille, quem bene nosti, missam in eius parochia celebraret, tantam secundum consuetudinem gratiam habebat²⁹² lacrimarum, ut Gerlacus, qui propter ministerium ex latere stabat, eandem considerans gratiam, admirans Dominum magnificaret²⁹³. Ex illa hora ita coepit ordinem diligere, ut non quiesceret; donec unus ex ordinis personis fieret. Multa tibi adhuc dicere possem²⁹⁴ de his, qui exemplo aliorum conversi sunt; sed brevitati studendum est.
NOVICIUS: Ex his quae iam audivi, certum est, alios converti per sermonem exhortationis, alios per virtutem orationis, nonnullos solo exemplo religionis.
MONACHUS: Dictum est superius, adhuc alias esse causas multiplices, quae multis occasiones sunt conversionis, scilicet infirmitatem, paupertatem, captivitatem, notam alicuius infamiae, periculum praesentis vitae, timorem sive visionem gehennalis poenae, solum desiderium coelestis vitae²⁹⁵.
NOVICIUS: De his precor ut exempla subiungas.
MONACHUS: Quod quosdam compellat infirmitas converti, quotidie videmus.