ThEMA | Source

Caesarius Heisterbacensis, Dialogus Miraculorum

Table of ContentsTable des matièresneeds transneeds transneeds trans

DISTINCTIO QUARTA. DE TENTATIONE

CAPITULUM C De converso, ad cuius pedes sibi ancilla lectum fecit.

Conversus quidam, vir bonus ac devotus, quem ego bene novi, cum ante annos paucos navem portantem vinum monasterii sui deduxisset in Flandriam, nocte quadam ancilla hospitis sui, dum secundum consuetudinem lectum illi in solario domus¹⁹⁹⁰ praeparasset, sibi alium ad pedes conversi stravit. Conversus cum dicto completorio isset cubitum, essetque lucerna exstincta, illa silenter vestes exuit, in lectum praeparatum se reclinavit, nudis pedibus conversi plantas pulsans, et quia ipsa foret, tusciendo¹⁹⁹¹ se prodens. Non has cerastis insidias conversus observaverat, aestimans alicui virorum eundem lectum fuisse praeparatum. Mordebat illa ungulas equi, id est, conversi¹⁹⁹², sed assessor¹⁹⁹³ eius, scilicet spiritus, per consensum non cecidit retro, quia mox ut vocem muliebrem audivit, ilico surrexit, vestes induit, et ad fenestras solarii vadens, orationes suas dicendo, mane illic exspectavit. Illa diutina expectatione suspensa, tandem confusa descendit.
NOVICIUS: Quid est cerastes?
MONACHUS: Serpens habens cornua, omni ferro duriora, ad instar gladii ex utraque parte incisiva. Unde Graece cerasta vocantur cornua¹⁹⁹⁴. Luxuria cerastes est, quia non solum animam interficit, sed et corpus irreparabiliter corrumpit. Omne enim peccatum extra corpus est, teste Apostolo, qui autem fornicatur, in corpus suum peccat¹⁹⁹⁵.

Notes:

¹⁹⁹⁰domus om B.
¹⁹⁹¹BKR tussiendo; conf. IX, 10. V, 20.
¹⁹⁹²BC plantas conversi.
¹⁹⁹³DP et corr A ascensor.
¹⁹⁹⁴ABDP unde Graeci cerasta vocant cornua.
¹⁹⁹⁵Cor. 1, 6, 18.

Indexed exemplum: TE018526