ThEMA | Source

Caesarius Heisterbacensis, Dialogus Miraculorum

Table of ContentsTable des matièresneeds transneeds transneeds trans

DISTINCTIO QUARTA. DE TENTATIONE

CAPITULUM XXI De milite, cuius filium tonitruum occidit, eo quod ob intemperiem aeris in blasphemiam prorupisset.

Ante hoc quinquennium, quando valida illa erant tonitrua, et pene a quotidiana aeris intemperie messis impediebatur, miles quidam provinciae nostrae, homo liber, de villa satis nobis¹⁴⁵⁹ vicina, videns a parte occidentali aerem obscurari, nubesque imbriferas oriri, iratus dixit: Ecce ubi¹⁴⁶⁰ iterum diabolus ascendit. Vix sermonem finierat, et ecce orta tonitrua filium eius in sinu nutricis percusserunt, ipsa incolumi permanente. Sed et in aliis, aedificiis scilicet et iumentis, blasphemus ille satis flagellatus est, ut disceret de cetero non blasphemare. Haec eodem tempore gesta sunt, quando fuilminata est curtis nostra in villa Cassele¹⁴⁶¹. Unde stultum est valde, ut homo mortalis, cinis et vermis, ponat in coelum os suum¹⁴⁶². Ecce huiusmodi mala aliaque innumera parit ira¹⁴⁶³.
NOVICIUS: Si Deus tam terribiliter peccatum irae vindicat in praesenti, puto quod huic vitio subiectos acriter puniet in futuro.
MONACHUS: Hoc ex capitulo sequenti cognosces.

Notes:

¹⁴⁵⁹BC nobis satis.
¹⁴⁶⁰BC ibi. X, 67: « ecce, inquit, ubi diabolus ille. »
¹⁴⁶¹sic emendavi. PK fulminata est turris villae nostrae Cassele, ABCDR fulminata est turris villae nostrae in Cassele. Obiter moneo, in Vita S. Engelb. I, 5. p. 301: « in quibusdam civitatibus et turribus suis turrita satisque pulchra construxit palatia, » pro turribus, non terris, sed potius curtibus esse legendum.
¹⁴⁶²Psal. 72, 9.
¹⁴⁶³BC ira parit.

Indexed exemplum: TE018006