Thesaurus Exemplorum
Medii Aevi

Retulit mihi¹⁶⁰³ Daniel Abbas Sconaviae, milite quendam honestum et in militia nominatum, in Campo factum fuisse monachum. Hic cum alium quendam militem, aeque in armis strenuum, in saeculo amicum habuisset, et die quadam ad conversionem eum hortatus fuisset; respondit ille magnae pusillanimitatis verbum: Vere, amice, ego forte venirem ad ordinem, si non esset una res quam timeo. Interrogante monacho, quaenam esset res illa; respondit miles : Vermiculi vestimentorum. Plannus enim laneus multos vermiculos nutrit. Tunc ille subridens ait: Och fortem militem ! Qui in bello diaboli non timuit gladios¹⁶⁰⁴, in militia Christi timere debet pediculos? Auferent tibi nunc pediculi regnum Dei¹⁶⁰⁵? Ille licet ad haec verba tunc tacuerit, tempore tamen modico emenso¹⁶⁰⁶, effectu respondit. Nam et ordinem tam verbis quam exemplo illius provocatus intravit. Contigit ut postea hi duo convenirent¹⁶⁰⁷. Coloniae in ecclesia beati Petri. Monachus vero Campensis cum alterum regulariter salutasset, subridens adiecit: Quid est, frater? Timesne adhuc vermiculos? Ille bene recordans unde talis interrogatio haberet originem, et ipse subridendo respondit verbum bonum, verbum¹⁶⁰⁸ memoria dignum: Crede mihi, frater, et hoc pro certo scias, quia si essent omnes vermiculi omnium monachorum in uno¹⁶⁰⁹ corpore, non me de ordine morderent. Quo verbo audito, ille multum aedificatus est, multis illud ad aedificationem recitans. Vides quantae fortitudinis factus sit is, qui ante conversionem nimis fuerat pusillanimis? Unde hoc, nisi ex divinis consolationibus, quae sunt in ordine? Haec de his dicta sint, quos vitium pusillanimitatis ne convertantur avertit. Nunc audi aliqua exempla de his, quos post conversionem ne proficerent tentavit et impedivit