ThEMA | Source

Caesarius Heisterbacensis, Dialogus Miraculorum

Table of ContentsTable des matièresneeds transneeds transneeds trans

DISTINCTIO QUARTA. DE TENTATIONE

CAPITULUM LXVII Item de claustro Westfaliae, cui Deus expensas pauperibus exhibitas duplo restituit.

Retulit mihi frater Godescalcus de Volmuntstein¹⁷³⁰ monachus noster, post eadem cara tempora cellerarium quendam ordinis nostri de Westfalia occurrisse sibi. Quem cum interrogasset, quo festinaret, respondit ille: Ad concambium. Ante messem ob necessitatem pauperum pecora nostra occidimus, calices et libros nostros impignoravimus. Modo Dominus misit nobis hominem, qui tantum nobis auri dedit, ut eius quantitas in duplo erogatis respondeat. Unde vado illud cambire pro argento, ut ex eo possim pignora nostra¹⁷³¹ redimere, et greges reparare. Tria haec exempla dicta sint contra illos, qui viros claustrales iudicant de avaritia.
NOVICIUS: Nunc primum intelligo quid sit, Date, et dabitur vobis.
MONACHUS: Non intelliges perfecte nisi in futura vita, quando pro terrena substantia, quam pro Christo dimisisti, sive pauperibus in illius nomine dedisti, recipies regnum, quod paratum est electis a constitutione¹⁷³² mundi. In illa die filius hominis tibi cum ceteris electis tuum enumerabit datum, et tu eius recipies¹⁷³³ promissum. Quid enim dicet? Esurivi, et dedistis mihi manducare, et cetera quae ibi sequuntur¹⁷³⁴. Viri tamen perfecti cum Domino iudicabunt.
NOVICIUS: Si tanta bona sequuntur eleemosynam, vae illis, qui in hoc brevi tempore sectantur avaritiam.
MONACHUS: Duo illa verba Domini, scilicet Date, et dabitur vobis, revotant memoriae meae rem gestam, his qui hospitalitatem exercent pro exemplo satis necessariam.

Notes:

¹⁷³⁰conf. Gelen. de Magn. Colon. p. 162.
¹⁷³¹P pignora nostra passim.
¹⁷³²ADP ante constitutionem, iuxta Ephes. 1, 4. Sed vide etiam Matth. 25, 34.
¹⁷³³BC recipies eius.
¹⁷³⁴Matth. 25, 35. * Homil. III. p. 41.

Indexed exemplum: TE018488