Thesaurus Exemplorum
Medii Aevi

Gula est solius corporis causa immoderatus et illecebrosus comedendi bibendique appetitus. Huius filiae sunt, immunditia, scurrilitas, inepta laetitia, multiloquium, hebetatio sensus circa intelligentiam. In gula sunt quinque gradus peccandi. Primus est cibos pretiosos et delicatos exquirere; secundus cibos¹⁷⁶⁰ curiose praeparare; tertius ante tempus sumere; quartas nimis avide; quintus in nimia quantitate. Gula primus homo in paradiso victus succubuit¹⁷⁶¹. Haec Esau primogenita subripuit. Gula Sodomitas ad peccatum maximum incitavit¹⁷⁶². Ipsa filios Israel deserto prostravit: Adhuc escae eorum erant in ore ipsorum, et ira Dei ascendit super, eos¹⁷⁶³ Iniquitas Sodomae fuit saturitas panis et abundantia¹⁷⁶⁴. Homo Dei, Abdo scilicet, missus in Bethel, propter comestionem a leone occiditur¹⁷⁶⁵. Dives, qui epulabatur quotidie splendide, in inferno sepelitur¹⁷⁶⁶. Nabuzardan princeps cocorum, id est, gula, Jerusalem destruxit¹⁷⁶⁷. Vides quanta pericula sint in illa? Accedant et¹⁷⁶⁸ testimonia. Ait enim Salomon: Vae terrae, cuius Principes mane comedunt. Item: Omnis labor hominis in ore eius, et anima eius non replebitur¹⁷⁶⁹ . Et in Evangelio Dominus: Videte ne corda vestra graventur in crapula et ebrietate¹⁷⁷⁰ . Item Apostolus: Honeste ambulemus, non in comessationibus, et cetera¹⁷⁷¹. Prima Christi tentatio a diabolo per gulam facta est¹⁷⁷². Unde Hieronimus dicit: In pugna Christi prius agitur contra gulam ieiunando, per quam victus est primus homo, Quam valida et importuna sit nobis vitii huius tentatio, quibusdam recentiori tempore gestis pandam exemplis. Ordinem etiam, in quantum potero, nec non et modum supradictarum tentationum, Adae scilicet et¹⁷⁷³ Esau et reliquorum, qui illic enumerati sunt, servare studebo.