Thesaurus Exemplorum
Medii Aevi

Juxta Coloniam sacerdos quidam fuit Mychael nomine, satis religiosus in genere suo. Hic²⁴²⁰ duarum villarum ecclesias rexit, ex quibus una Burge²⁴²¹, altera Rode vocatur. Tempore quodam in²⁴²² Parascheve, cum in una ecclesia sero matutinas dixisset, et ante diem, servo suo absente, solus ad alteram properaret, timore viae gladium secum portavit. Qui cum ad quoddam nemus venisset, tantus timor et horror eum invasit, ut omnes pili capitis eius, sicut dici solet, sursum erigerentur, et gelido sudore omnes eius artus²⁴²³ perfunderentur. Quem tamen²⁴²⁴ tanti horroris causa latere non potuit, quia mox ut oculos ad nemus vertit, hominem teterrimum iuxta arborem satis altam stare conspexit. Qui eo intuente in momento adeo crescendo ascendit, ut eidem arbori aequaretur; circa quem fragor arborum et nimii fremitus ventorum excitabantur. Territus supra modum sacerdos, fugit²⁴²⁵, quem diabolus cum turbine a tergo insequens, usque ad villam Rode non deseruit. Postea cum idem sacerdos visionem simul et timorem converso coenobii Veteris Montis, Richardo nomine, recitaret²⁴²⁶, ille, sicut vir erat²⁴²⁷ religiosus, religiosum ei verbum respondit: Domine, inquit, ecclesiastice, si ad divina eundo²⁴²⁸ psalmum in os vestrum assumsissetis²⁴²⁹,, non vobis haec in via evenissent. Terror ille poena peccati fuit. Diabolus revera timet psalmum, non gladium. Corpus eius, ut ait Job, imo Dominus ab Job, quasi scuta fusilia, squamis²⁴³⁰ se comprimentibus. Deputabit²⁴³¹ quasi paleas ferrum, et quasi lignum putridum, aes. Non est super terram potestas, quae comparetur ei²⁴³².
NOVICIUS: Sicut colligo ex his verbis sancti Job, si diaboli virtus ligata et limitata non esset, nullus hominum subsistere posset²⁴³³.
MONACHUS: Quod autem hominem laedere non possit, nisi quantum a Deo fuerit permissus, in fine huius distinctionis satis manifesto tibi pandam exemplo.