Thesaurus Exemplorum
Medii Aevi

Nobilissimus princeps Theobaldus Comes Campaniae, de cuius operibus misericordiae in Vita sancti Bernardi Abbatis Claraevallis mira leguntur³⁴⁰⁴, tantae humilitatis erat, ut etiam praesentialiter tuguria leprosorum visitaret. Adhuc vivunt qui illum in carne viderunt. Habebat autem ante quoddam suum castrum leprosum quendam manentem, ante cuius domunculam quotiens eum contigit transire, de equo descendit, et ad illum intrans, postquam pedes eius lavit, eleemosynam dedit, et abiit. Post breve tempus idem leprosus Comite ignorante defunctus³⁴⁰⁵ est et sepultus. Die quadam Comes iterum via illa transiens, mox ut ante tugurium sibi notum venit, descendit dicens: Oportet me visitare patrem meum. Intransque non leprosum, sed in leprosi forma et habitu contemplatus est Dominum. Cui cum consueta opera misericordiae impendisset, et tanto devotius, quanto inspirabatur a visitato fortius, hilaris exivit. Cumque suis dixisset, gaudeo me vidisse leprosum meum ; responderunt ei quidam: Domine sciatis pro certo eum dudum esse defunctum, et in tali loco sepultum. Quod ubi comperit princeps piissimus, exultavit in spiritu, eo quod videre³⁴⁰⁶ eique ministrare meruerit praesentialiter, quem multo tempore in suis membris veneratus est³⁴⁰⁷. Ut autem Dominus Jesus tantam humilitatem tanti³⁴⁰⁸ principis etiam in praesenti remuneraret, et ut verba sua vera ostenderet quae dixerat: Quicquid uni ex minimis meis fecistis, mihi fecistis³⁴⁰⁹ , se illi exhibere dignatus est. Audi aliam visionem, ista adhuc excellentiorem.