Thesaurus Exemplorum
Medii Aevi

NOVICIUS: Cum resurrectio passione dignior sit, quid est quod tantae revelationes habentur de illa, et tam pauca³⁴²⁶ de ista?
MONACHUS: Primo hoc ascribendum est humilitati Christi, ne videatur iactanter manifestare ea quae egit gloriose, et supprimere illa quae pertulit ignominiose. Deinde quod nullum est sacramentorum, quod tam efficax sit divini amoris incentivum, quomodo opprobria passionis. Apostolus dicit se nihil scire nisi Jesum Christum, et hunc crucifixum³⁴²⁷ . Ergo Christi passio eius fuit lectio. O quantum legere desiderabat Job in libro passionis Christi, quando dicebat : Quis mihi tribuat auditorem, ut desiderium meum Omnipotens audiat, et librum scribat ipse qui iudicat, ut in humero meo portem et circumdem illum quasi coronam mihi³⁴²⁸  ? Liber vitae Christus est, secundum Johannem septem signaculis signatus³⁴²⁹ , in quo, ut ait Paulus³⁴³⁰, est salus, vita et resur- -[f° 109]- rectio nostra, quem Apostoli cum multa gloria miraculorum, quasi coronam portaverunt per universum mundum. Quem cum primo obtulissent scienti litteras, id est Judaeo, et respuisset illum tanquam signatum, obtulerunt³⁴³¹ illum nescienti litteras, scilicet gentilitati³⁴³², et cum illum intelligere non posset, exposuerunt ei, sicut Philippus eunucho³⁴³³. Librum hunc Christus ipse³⁴³⁴ scripsit, quia propria voluntate passus est. In pelle siquidem corporis eius scriptae erant litterae minores et nigrae, per lividas plagas flagellorum; litterae rubeae³⁴³⁵ et capitales, per infixiones³⁴³⁶ clavorum; puncta etiam et virgulae, per punctiones³⁴³⁷ spinarum. Bene pellis eadem prius fuerat multiplici percussione³⁴³⁸ pumicata, colaphis et sputis cretata, arundine liniata³⁴³⁹.
NOVICIUS: Gaudeo me cum fructu didicisse quod ignoravi.
MONACHUS: Dicam tibi nunc aliquas visiones Spiritus sancti.
NOVICIUS: Peto ut prius expedias me de Spiritu sancto, et si sit differentia inter ipsum et spiritum quem Christus in cruce emisit.
MONACHUS: Hoc faciam ipso adiuvante, et hoc quanto compendiosius potero.