Thesaurus Exemplorum
Medii Aevi

Nondum duo anni sunt elapsi, quod in villa quadam iuxta Coloniam, sicut nuper illic audivi cum praeterirem, loco furis quidam deprehensus est. Utrum esset reus vel innocens, mihi dici non potuit. Quo morti adiudicato³⁶³⁸, et laqueo collo eius iniecto, in patibulo appendissent, ille nullum dolorem sustinens, eum iam mortuus aestimaretur, dura voce clamavit: Invanum laboratis³⁶³⁹, non poteritis me strangulare, sanctus³⁶⁴⁰ Episcopus dominus meus Nycholaus mihi assistit. En video illum. Quod multi audientes, et ita esse experimento cognoscentes, putantes eum innocentem, ob honorem sancti Nycholai depositum abire permiserunt. Qui Bruwilre ad memoriam sui liberatoris currens, gratias egit, se a suspendio illius meritis absolutum proclamans.
NOVICIUS: Audivi ab infantia³⁶⁴¹ quod sanctus Nycholaus omnes Episcopos misericordia praecellat.
MONACHUS: Tantae pietatis est et misericordiae, ut et malos a morte sicut dictum est saepe liberet, et bonos mori desideret. Illos, ut emendentur; istos, ut aeterna beatitudine fruantur. Revera dissolvi et esse cum Christo, multo melius est. Et beati sunt mortui qui in Domino moriuntur³⁶⁴² .