Thesaurus Exemplorum
Medii Aevi

In Francia virgo quaedam Christum in aetate trium annorum quando iam loqui per naturam poterat, videre desi- -[f° 88]- derans, hoc ut fieret precibus instabat. Erat enim tam perfectae vitae, ut non immerito talia praesumeret, et se exaudiri speraret. Die quadam cum dicta missa ipsa, populo omni egresso, sola in ecclesia moram faceret, et oraret, infantem quasi triennem circa altare deambulantem conspexit, putans a matre illum ibidem neglectum. Erat enim tam³³¹⁴ speciosissimus, et tantae gratiae vultus eius, ut in illius aspectu delectata ad se vocaret et manibus demulceret, sic dicens: Dic mihi bone puerule, ubi est mater tua? Qui dum nihil ei responderet, aestimans illa utpote infantem eum nondum posse fari, subiunxit: Nosti dicere Pater noster tuum? Ad quod dum non responderet ut prius, adiecit: Dic post me, Ave Maria gratia plena, Dominus tecum. Et dixit post eam infantulus eadem verba tam hilariter et tam distincte, ut illa miraretur. Similiter factum est de clausula secunda, scilicet, Benedicta tu in mulieribus. Cum vero ei praediceret: Et benedictus fructus ventris tui, totius humilitatis magister sua inspiratione sciens scriptum: Non te laudet os tuum, sed alienum³³¹⁵ , eandem clausulam dicere noluit, sed mox illa intuente per ostensam formam coelos penetravit. Tunc primum virgo venerabilis se exauditam intelligens, gratias egit Christo, qui tam celeriter implevit³³¹⁶ desiderium suum ex semetipso. Ipso revera Dominus Jesus est fructus ille benedictus, de quo Isaias cecinit: Et erit fructus terrae sublimis³³¹⁷ . Fructus terrae, filius Mariae. Benedixisti, inquit Psalmista, Domine terram tuam³³¹⁸ . Non potuit gingnere³³¹⁹ terra benedicta nisi fructum benedictum.
NOVICIUS: Dignum mihi nota videtur, quod Dominus orationem ore proprio³³²⁰ editam recitare renuit, et in verba quibus matrem beatificare videbatur mox erupit.
MONACHUS: Exemplum nobis dedit, ut et ita faciamus. Sermonem iam in longum protraximus tam in praesenti distinctione quam in praecedentibus de apparitionibus³³²¹ infantiae Salvatoris; vis nunc aliquas audire³³²² ex illis visionibus quibus se ostendere dignatur suis amicis in aetate perfecta?
NOVICIUS: Volo et desidero, et maxime tamen de illius passione.
MONACHUS: Bene moveris. Passio enim Domi- -[f° 89]- nica proxima est sollemnitas post Purificationem. Ipsa est festum propitiationis. Per ipsam tartarus est destructus, paradisus apertus, captivitas captivata, mors evacuata. Passio Domini omnium tribulationum humanarum est antidotum. Contritionem excitat, lacrimas produit, tentationes compescit.