Thesaurus Exemplorum
Medii Aevi

Mulier quaedam cum apes multas nutriret, et illae non proficerent, imo passim morerentur, cum contra hoc remedium circumquaque quaereret, dictum est ei quia si corpus Domini inter illas locaret, mox lues ipsa cessaret. Quae ecclesiam adiens, et se communicare velle simulans, corpus Domini sumpsit; quod statim a sacerdote recedens extraxit, et in uno -[f° 173]- ex alveolis illud locavit. Mira Dei potentia. Vermiculi Creatorem agnoscentes³⁸⁰⁵, de favis suis dulcissimis hospiti³⁸⁰⁶ dulcissimo capellulam³⁸⁰⁷ mirae structurae fecerunt, in qua altare eiusdem materiae erigentes, sacratissimum corpus super illud posuerunt. Et benedixit Dominus operibus eorum. Processu temporis cum femina idem vasculum aperuisset, et iam dictum oratorium considerasset, expavit, currensque ad sacerdotem, confessa est ei omnia et quae egit et quae vidit. Tunc ille assumptis secum³⁸⁰⁸ parochianis suis ad vasculum venerunt, apes circumvolantes et in laudem creatoris bombizantes abcegerunt, capellulae parietes, fenestras, tectum, campanile, ostium, et altare admirantes, corpus Domini cum laude et gloria ad ecclesiam³⁸⁰⁹ retulerunt. Licet enim³⁸¹⁰ mirabilis sit Deus in sanctis suis³⁸¹¹, mirabilior tamen in his minimis praedicatur. Ne ergo aliquis de cetero tale quid praesumat, referam tibi rem terribilem, quam mihi anno praeterito magistra de Insula sancti Nycholai recitavit.