Thesaurus Exemplorum
Medii Aevi

Retulit nobis Abbas Daniel de lupa rem satis mirabilem. In Carpania⁴³⁰⁸, inquit, ubi Scholasticus eram, scholaribus die quadam licentiatum fuerat ire ad silvas. Qui in nemore lupae antrum reperientes, catulos omnes eiecerunt. Quorum pedes unus bipenni sua amputavit. Quibus recedentibus lupa rediit, et ut catulorum pedes praescisos⁴³⁰⁹ vidit, recedentes insecuta, solummodo eum qui hoc egerat, nimium furens impetivit. Ille vero timens, arborem ascendit. Quem cum insequi non posset, coepit unguibus circa radices fodere. Et cum sic non proficeret, alios lupos advocavit. Interim nunciantibus scholaribus, homines de villa cum gladiis, cuspitibus⁴³¹⁰ et baculis ei in auxillum venientes, lupos abegerunt, in medio sui illum ducentes. Lupis invitatis ad horam sequentibus et redeuntibus, illa sola perseveravit, vindicare se tentans multis conatibus. Et cum essent proximi villae, lupa se periculo dans in ultionem catulorum, armatorum custodias irrupit, et scholaris gulae insiliens, protinus extinxit. Quae statim occisa est.
NOVICIUS: Satis miror quod scholarem illum prae ceteris cognoscere potuit.
MONACHUS: Multa huiusmodi fiunt Dei iudicio, ex quibus unum est quod sequitur.