Thesaurus Exemplorum
Medii Aevi
Caesarius Heisterbacensis, Libri VIII miraculorum
INCIPIT LIBER PRIMUS MIRACULORUM
De pane, qui in sanguinem uersus est, dum in die sancte Margarete eum mulier inobedienter coqueret96
Anno presenti, qui est M CC XXVus ab incarnatione Domini, iuxta castrum Diest97 in quadam uilla dyocesis Treuerensis sacerdos in ecclesia diem festum sancte Margarete martiris et uirginis98 eque ut diem dominicum celebrare denuntiauit. Femina quedam pane carens et, ubi emere posset, propter messem instantem non inueniens, iam dicto sacerdoti necessitatem suam exposuit et, ut sibi panes coquere in prefate uirginis die liceret, humiliter postulauit. Et licentiauit ei sacerdos. Qua coquente, cum alia mulier superueniret et diceret: "Hodie non licet panes coquere", illaque responderet: "Per licentiam est sacerdotis nostri", subiunxit: "Certe, ex quo uos coquetis, et ego coquam". Coxerunt ambe, sed dissimili fine. Nam panis prioris propter licentiam in decoctione seruauit naturam, sequentis uero propter inobedientiam totus conuersus est in sanguinem. — Sanguis peccatum exeo premit: ut ibi 'sanguis sanguinem tetigit'99, in uno eodemque opere huius mulieris sanguis sanguinem tetigit, quia peccatum peccato annectens sacerdoti suo inobediens extitit et contra prouincie consuetudinem martyrium sacre uirginis uiolauit. Huius miraculi testis est dominus Hermannus abbas Loci sancte Marie100, cui eodem tempore res gesta ueraciter innotuit.
Referam nunc aliud miraculum, per quod facile cognoscet christianus, quam sit periculosum, si oues rebelles fuerint pastoribus, id est subditi sacerdotibus, maxime ubi ea, que prohibentur, sunt mala in se Deoque contraria.
- 96 Übernommen in die Sammlung Uiaticum narrationum Nr. 54 (s. S. 8 f.); auch bei Herbert, Cat. of romances III 611,75 und 613,99. Ganz kurz Herolt, Prompt, exempl. F.
- 97 Diez an der Lahn unterhalb Limburg (Nassau).
- 98 13. Juli.
- 99 Os. 4,2
- 100 Über Hermann, den ersten Abt des Cistercienserklosters Marienstatt im Westerwald (1215—1223), der vorher Heisterbach und Himmerode geleitet und sich 1223 nach Niederlegung seines Amtes nach Himmerode zurückgezogen hatte, vgl. Band 1, 82 Anm. 2.
