Thesaurus Exemplorum
Medii Aevi

Quinto est scandali motiva.

refert Heraclius quod quedam juvencula nomine Alexandrina que summe cupiebat castitatem servare et haberet summam pulcritudinem, fecit se includi in quodam magno sepulcro, nec de decem annis fuit visa ab homine, nec ipsa pulcritudinem hominis respexit, sed per exiguum foramen recipiebat necessaria vite. Cunque requireretur causa tante penitentie, ipsa vero respondit:

"In hoc sepulcro volo esse inclusa ne violetur castitas mea et ne polluam animas ad similitudinem Dei factas et creatas. " Cunque quereretur quomodo posset vivere, respondit : "A principio diei orationi vaco, opus ex lino facio. Postea per sanctos, patriarchas, apostolos, martires, confessores, virgines cogitando discurro. Ceteris horis cibum capio, vespere Deum glorifico et ex adventu tenebrarum et perditio lucis agnosco quam bonum sit adherere Deo, et damnationem vitare. "