Thesaurus Exemplorum
Medii Aevi

Tercio est ad culpam provocativa.

Legitur in Vitas Patrum quod duo fratres vacantes cogitationibus immundis sunt impugnati a spiritu fornicationis; et ideo recedentes ad seculum acceperunt uxores. Postea unus illorum dixit alteri: "Quid modo lucrati sumus ex istis immundiciis nostris ?"Alter respondit: " Damnationem eternam et dimisimus consortium angelorum. " revertuntur ad heremum et contriti et penitentes recipiuntur a sene, et cum annualem penitentiam injunxisset, anno elapso visitavit eos, et facies unius apparuit pallida et alterius rubicunda. Requiritur causa a sene hujus diversitatis, tunc primus respondit: "Continue cogito acerbitatem penarum inferni, que mihi debentur ex enormitate peccatorum meorum; et ideo habeo faciem pallidam. " Secundus vero dixit: "recolo beneficium Dei, quod mihi misero intulit, retrahendo me a peccato et auferendo penam inferni, et ex hoc sum in continuo gaudio; quare facies mea est rubicundior. " Tunc cognovit senex quod essent veri penitentes, et dilexit eos.