Thesaurus Exemplorum
Medii Aevi

Accidia multa mala facit.

Primo est operis Dei neglectiva.

Dicitur quod quidam habuit vineam plenam diversis herbis corruptis, bonam tamen ad productionem vini, et ideo misit filium suum ad vineam praedictam ut eradicaret malas herbas. Qui considerans magnitudinem et multitudinem herbarum fuit visum sibi impossibile quod posset eam purgare. Quare sub umbra ad dormiendum se projecit. Pater vero ejus veniens interrogavit eum quare dimiserat operari, cui ille: “ Vidi tantam multitudinem quod viginti homines non suffecissent. ” Cui pater: " Si modo amovisses unam herbam, cras aliam, et iterum postcras aliam, finaliter purgasses vineam. Sed quia nunquam incepisti, nunquam finies. "

Iste pater est Deus, filius homo, vinea est anima, male herbe sunt peccata mortalia, quia vero homo nunquam incepit perfecte evellere has herbas corruptas, ideo nunquam finietur purgatio peccatorum sed magis crescunt.